«Այսօր Երևանում գրեթե նույն ժամին, սակայն միանգամայն տարբեր վայրերում տեղի են ունենալու երկու իրադարձություններ, որոնք գրեթե հավասարապես կարևոր են պետության ու հասարակության համար: Մարզահամերգային համալիրում կայանալու է Սերժ Սարգսյանի երդմնակալության արարողությունը, Ազատության հրապարակում, ինչպես Րաֆֆի Հովհաննիսյանն է հայտարարել՝ «Նոր Հայաստանի երդմնակալությունը»»,- գրում է «168 ժամը» առաջնորդողում և հավելում.
«Իշխանությունը, բնականաբար, հեգնանքով է վերաբերվում Ազատության հրապարակում կայանալիք միջոցառմանը, ընդդիմությունն էլ՝ ՄՀՀ-ում տեղի ունենալիք երդմնակալությունը համարում է ստի, կեղծիքի երդմնակալություն: Սակայն, անկախ այս փոխադարձ վերաբերմունքից ու որակումներից, երկու միջոցառումներն էլ չափազանց կարևոր են Հայաստանի համար, քանի որ մի դեպքում՝ իր լիազորություններն է ստանձնելու, ինչպես Րաֆֆի Հովհաննիսյանն է ասում, «դե ֆակտո» նախագահ Սերժ Սարգսյանը, մյուս դեպքում՝ պաշտոնապես կես միլիոնից ավելի քաղաքացիների վստահությունը ստացած «Ժառանգության» առաջնորդն է ինչ-որ խորհրդանշական քայլ անելու, որից կարող է կախված լինել ընդդիմության ինչպես՝ հաջողությունը, այնպես էլ՝ տապալումը վերջին ամիսների պայքարից հետո:
Այսօրվա կարևորությունը, սակայն, ինքնին նշված միջոցառումները չեն, այլ այն, թե որքանով երկու կողմերը կկարողանան խուսափել բախումներից, ինչի մասին հատկապես վերջին օրերին ակնարկում են շատերը: Ընդ որում, ակնարկողների ու «բախման ակնկալիք» ունեցողների մի մասն այսօր մասնակցելու է Սերժ Սարգսյանի երդմնակալությանը, մյուս մասը՝ Րաֆֆի Հովհաննիսյանի: Իրավիճակի նրբությունն այն է, սակայն, որ հնարավոր բախումներից թե՛ Սերժ Սարգսյանը, թե՛ Րաֆֆի Հովհաննիսյանը հաստատապես տուժելու են: Հասարակությունը՝ առավել ևս»:
