Հայաստանում ֆրանսիայի դեսպան Ժան-Ֆրանսուա Շարպենտիեն այսօր ՀՀ էկոնոմիկայի նախարարությունում ողջունել է ԵՄ-Հայաստան բանակցությունների նոր մանդատի գործընթացը։ «Մենք այժմ շատ փթթուն, շատ աշխույժ ժամանակահատված ենք ապրում Հայաստան-ԵՄ տնտեսական հարաբերություններում։ Իրողություն, որից չենք կարող գոհ չլինել և մեր ուրախությունը չհայտնել։ Մենք բնականաբար շատ ուրախ ենք նման տնտեսական ակտիվության համար»,- ասաց դեսպանը։
Էկոնոմիկայի նախարարության հետ համատեղ մեկնարկել է ԵՄ «Թվինինգ» ծրագիրը, որի նպատակն է ներդաշնակեցնել ՀՀ օրենսդրությունը սպառողների շահերի պաշտպանության ոլորտում առկա ԵՄ չափանիշներին:
Ծրագրի ղեկավար Ֆիլիպ Իվերնյոն մեր թղթակցի հետ հարցազրույցում ասել է, որ խոչընդոտ չի տեսնում ԵՏՄ անդամ Հայաստանի ու ԵՄ առևտրային և տնտեսական հարաբերություններում։ «Գիտեք ինչ, աշխարհը գլոբալիզացված է։ Ես չեմ տեսնում որևէ արգելք։ ԵՏՄ անդամ լինելով՝ Հայաստանը կարող է ավելի բարենպաստ պայմաններ ունենալ»,- ասաց ԵՄ ծրագրի ղեկավարը։
800 հազար եվրո արժողությամբ «ՀՀ շուկայի վերահսկողության պետական տեսչության ինստիտուցիոնալ կարողությունների հզորացում և ներդաշնակեցում ԵՄ չափանիշներին» ծրագիրը կիրագործվի ՀՀ շուկայի վերահսկողության պետական տեսչության ինստիտուցիոնալ զարգացման և ՀՀ ԵՄ չափանիշներին համապատասխանող շուկայի վերահսկողության համակարգի ստեղծման միջոցով:
Ծրագրի արդյունքում ակնկալվում է ունենալ արդիական և արդյունավետ գործող ՀՀ շուկայի վերահսկողության պետական տեսչություն, միջազգային և տարածաշրջանային կազմակերպությունների մասնակցության ու ազդեցության բարձրացում շուկայի պատշաճ վերահսկողության և սպառողների շահերի պաշտպանության գործում և բարելավված գործարար միջավայր:
1.5 տարի տևողությամբ «Թվինինգ» ծրագիրը իրականացվում է «Հյուսիսային Իռլանդիայի միջազգային համագործակցություն» (NI-CO) ընկերության կողմից` Լիտվայի էկոնոմիկայի նախարարությանն առընթեր պետական ոչ պարենային ապրանքների տեսչության աջակցությամբ («Թվինինգ» գործընկերներ անդամ-պետություններից):
Մանրամասները դիտեք տեսանյութում։
