Թուրքական Hurriyet թերթի փոխանցմամբ՝ Թուրքիայի վարչապետ Ահմեթ Դավութօղլուն ԱՄՆ-ին զգուշացրել է Սիրիայի քրդերի «Դեմոկրատական միություն» կուսակցությանը (PYD) ռազմական օգնություն ցուցաբերելու անթույլատրելիության մասին։ Ավելի վաղ հաղորդվել էր, որ ամերիկյան ռազմափոխադրման ինքնաթիռները 50 տոննա զինամթերք են նետել Սիրիայի հյուսիսում գտնվող Հասեկե նահանգում:
«Ոչ ոք չի կարող վստահեցնել մեզ, որ զենքը, որը մեր դաշնակիցները մատակարարում են PYD-ին, չի ընկնի «Քրդստանի աշխատավորական» կուսակցության (PKK) ձեռքը։ Մենք PYD-ին հատկացվող օգնությունը դիտարկելու ենք որպես Թուրքիայի դեմ ուղղված քայլ։
Եթե այդ զենքն ընկնի Թուրքիա ու վնաս պատճառի մեր զինվորներին, ոստիկանությանն ու խաղաղ բնակիչներին, ապա այն կոչնչացվի։ Եթե ռազմական օգնություն ցուցաբերվի PYD-ին ու PKK-ին, ապա մենք միջոցներ կձեռնարկենք Սիրիայում, ինչպես նաև Հյուսիսային Իրաքում։ Թուրքիան այդ հարցը դիտարկում է որպես իր ազգային անվտանգության հարց»,- ասել է Դավութօղլուն:
