Ֆրանսահայ հայտնի էաբան և ազգաբան Ալեքսանդր Վարպետյանը Facebook-ի իր էջում հայտարարությամբ է հանդես եկել, որում մասնավորապես ասվում է.
Ճաքը թույլ տեղ է փնտրում, ճառագայթը՝ ճաք…
Ամենայն պատասխանատվությամբ հայտարարում եմ հայրենիքից մեկ տասնամյակ ի վեր մեր վտարումն ու հետապնդումները, բացի ազգամշակութային և ոգեգաղափարական գործունեությունից, ամիջանականորեն առնչվում են հոկտեմբեր 27-ի պետական ոճրագործության հետ, որի մեր քննախուզությունը ակնհայտորեն դիպուկ էր:
Թեկուզ այն 1 տարի է թաղված է, այսուհանդերձ շարունակում է մտահոգել բուն մեղավորներին ու մեղսակիցներին:
Հայրենիք մուտքի արգելման պատճառներից մեկը այդ է:
Մյուսը՝ ինֆորմացիոն մեկուսացումը, լավագույն լուծումը՝ իմ վերացումը, եթե ոչ այստեղ՝ ապա վստահաբար այլուր:
Ուստի, մոտակա ժամանակներում ինձ հետ կատարվող նման միջադեպ երբեք բնական չհամարել:
Զի, այլևս լինելու են այլ բացահայտումներ:
Ժամանակին անգամ կիսաանկախ Հայաստանը գլխատվեց՛ այժմ ԿԱՏԱՐԵԼԱՊԵՍ ՕԿՈՒՊԱՑՎԱԾ Է…
Բայց տառապած այս ազգը տեսել է շատ ավելի վատը ու չի ընկճվել: Նա արժանի է արժանապատիվ գոյության և անպատճառ կունենա:
ՃԱՔԸ ԹՈՒՅԼ ՏԵՂ Է ՓՆՏՐՈՒՄ, ՃԱՌԱԳԱՅԹԸ՝ ՃԱՔ… Եվ մեկը կա, և մյուսը…
Հարկ է հիշեցնել, որ այսօր ՀՀ ԱԺ «Ժառանգություն» խմբակցության քարտուղար Զարուհի Փոստանջյանը հարց է ուղղել ՀՀ վարչապետ պարոն՝ Տիգրան Սարգսյանին, ՀՀ ԱԱԾ պետ պարոն՝ Գորիկ Հակոբյանին , ՀՀ սփյուռքի նախարար տիկին՝ Հրանուշ Հակոբյանին, ՀՀ առողջապահության նախարար պարոն՝ Դերենիկ Դումանյանին։
«Հարգելի գործընկերներ, ՀՀ լայն հասարակությունը իր խորը մտահոգությունն է հայտնել մեր հայրենակից՝ 70 ամյա Ալեքսանդր Վարպետյանի մուտքը՝ Հայաստանի Հանրապետության տարածք արգելելու փաստի առթիվ:
Համաձայն լրատվամիջոցների տարածած տեղեկատվության՝ Ալեքսանդր Վարպետյանը արդեն մի քանի օր է, ինչ գտնվում է Զվարթնոց օդանավակայանի տարածքում, և նրա տեղաշարժվելու իրավունքը արգելված է:
Երեկ երեկոյան ՀՀ ԱԺ «Ժառանգություն» խմբակցության պատգամավորներ Ռուբեն Հակոբյանը և Զարուհի Փոստանջյանը Զվարթնոց օդանավակայանի անվտանգության և իրավապահ ծառայությունների աշխատակիցներից փորձել են պարզաբանում ստանալ պարոն Ալեքսանդր Վարպետյանի գտնվելու վայրի, նրա տեղաշարժը արգելելու հիմքերի և առողջական վիճակի մասին, սակայն որևէ իրավասու անձը այդպես էլ վերը նշված հարցերի շուրջ պատասխան չի տրամադրել Հիմք ընդունելով վերոգրյալը՝ խնդրում եմ հնարավորինս սեղմ ժամկետում տրամադրել պատասխան հետևյալ հարցերի վերաբերյալ.
1. Պարոն Ալեքսանդր Վարպետյանը քանի՞ օր է գտնվում Զվարթնոց օդանավակայանում:
2.Եթե կան իրավական հիմքեր պարոն Ալեքսանդր Վարպետյանին Զվարթնոց օդանավակայանում պահելու, նրա տեղաշարժը արգելու համար, ապա խնդրում եմ տրամադրել տվյալ հիմքերի՝ որոշում, արձանագրություն, այլ փաստաթղթերի, պատճեները:
3. Պարոն Ալեքսանդր Վարպետյանին համապատասխան բուժօգնություն տրամադրվել է, թե ոչ և եթե այո, ապա նրա առողջական վիճակը բավարար է, որպեսզի նա գտնվի փակ տարածության մեջ՝ ըստ էության մեկուսացված:
4. Տարեց հայ մարդու նկատմամբ այսպիսի վերաբերմունքի դրսևորումը Հայաստանի Հանրապետության իշխանությունների կողմից արդյոք չի վնասի «Արի տուն» ծրագրին:
