Լիբանանի մայրաքաղաք Բեյրութի կենտրոնում կրկին հակակառավարական ցույցեր են։ Պլյաս դե Մարտիր հրապարակի շրջանում 4 ժամ շարունակվել է երիտասարդ ակտիվիստների և իրավապահների միջև դիմակայությունը՝ փոխանցում է TASS գործակալությունը։
Ոստիկանությունն իրեն ագրեսիվ դրսևորող բազմությանը ցրելու մի քանի փորձ է ձեռնարկել, սակայն արցունքաբեր գազով նռնակների և ջրցան մեքենաների կիրառումից հետո նրանք կրկին վերադառնում են կենտրոն։
Կարմիր խաչի լիբանանյան միության աշխատակիցների տեղեկություններով՝ բախումների ընթացքում տուժել է 36 մարդ, առնվազն 10 ցուցարարներ կորցրել են գիտակցությունը։ Ոստիկաների շարքում նույնպես կան տուժածներ, մի կրտսեր լեյտենանտ ծանր վնասվածք է ստացել։
Հուզումների հիմքում միջլիբանանյան երկխոսության չորրորդ փուլի ձախողումն է։ Քաղաքական գործիչները կրկին ցուցաբերել են անկարողություն՝ պայմանավորվելու ապագա նախագահի թեկնածության շուրջ, որը կգոհացնի բոլոր խմբակցություններին։
Օգոստոսի 22-ին Բեյրութում սկսված հուզումները, որոնք սոցցանցերում ստացել էին «աղբային հեղափոխություն» անվանումը, չեն դադարում։ Սոցիալական կարգախոսները փոխվել են քաղաքականի, բողոքական շարժման մասնակիցներն այժմ ձգտում են իշխանությունից կոռուպցիոն ռեժիմի հեռացման։
