Պռոշյանի գյուղապետի սպանությունը անընդունելի է` անկախ նրանից, թե ինչ պայմաններում է նա սպանվել: Այսօր լրագրողների հետ հանդիպման ժամանակ այս մասին ասաց ԱԺ պատգամավոր, ԱԺ արտաքին հարաբերությունների հանձնաժողովի նախագահ Արտակ Զաքարյանը` անդրադառնալով Պռոշյանի դաշնակցական գյուղապետ Հրաչ Մուրադյանի սպանությանը:
Նրա գնահատմամբ` տեղի է ունեցել ծայրահեղ անընդունելի երևույթ` անկախ նրանից, թե ինչ պայմաններում է այն տեղի ունեցել և ինչի համար:
«Պետք է խստորեն պատժվեն այն անձինք, ովքեր ընդգրկված են այդ գործընթացում: Ես կարծում եմ, որ ճիշտ չէ քաղաքականացնել այս գործընթացը: Սպանվել է ՀՀ քաղաքացի, սպանվել է Արցախյան ճակատամարտում մարտական ուղի անցած մարդ, համայնքի ղեկավար և պարզապես հայ մարդ, ինչը չափազանց ցավալի է»,- նշեց բանախոսը:
Անդրադառնալով ՀՀԿ-ական Գալուստ Սահակյանի՝ սպանությանը վերաբերող մեծ աղմուկ բարձրացրած մեկնաբանությանը` նա նկատեց, որ պարոն Սահակյանին սխալ են հասկացել:
Լուսանկարը՝ PanARMENIAN Photo-ի
