«Առաջին լրատվական»-ի տեղեկություններով՝ Պռոշյանի գյուղապետ Հրաչ Մուրադյանի սպանության գործով ձերբակալվել է երկու անձ: Մեր աղբյուրների փոխանցմամբ՝ ձերբակալվածներն են Արայիկ Պետրոսյանը՝ 1982 թ. ծնված, և Արտակ Պետրոսյանը՝ 1980թ. ծնված: Ի դեպ ձերբակալված տղաները եղբայրներ են:
Նշենք, որ այս գործով նախաքննությունը շարունակվում է: Հարուցված քրեական գործի նախաքննության շրջանակում հարցաքննվել են մի քանի տասնյակ անձինք, կատարվել են քննչական համալիր փորձարարություններ և դեպքի վայրի լրացուցիչ զննություն:
Հիշեցնենք, որ ապրիլի 2-ի առավոտյան, աշխատավայրի դիմաց հայտնաբերվել էր Պռոշյան համայնքի ղեկավար Հրաչ Մուրադյանի դին: Հ. Մուրադյանը մահացել էր գլխին աջ քունքի հատվածից 1,5 սմ վերև ստացած հրազենային վնասվածքից: Աբովյանի դիահերձարանում Հրաչ Մուրադյանի աջ քունքի շրջանից դուրս է բերվել ՏՈԶ տեսակի գնդակ, ինչը հիմք է տալիս քննչական խմբին, որ գյուղապետի վրա կրակել են ՏՈԶ տեսակի հրազենով: Հրաչ Մուրադյանի սպանության առիթով քրեական գործ է հարուցվել՝ քրեական օրենսգրքի 104-րդ հոդվածի 2-րդ մասի 2-րդ կետի` դիտավորյալ սպանություն, և 235-րդ հոդվածի՝ ապօրինի զենք զինամթերք պահել, հատկանիշներով:
Նշենք նաև, որ Հրաչ Մուրադյանի ընտանիքը 1966 թվականին Հայաստան էր տեղափոխվել Սիրիայից: Նա ծնվել էր 1963թ. հուլիսի 1-ին, ավարտել է Պռոշյանի միջնակարգ դպրոցը, բարձրագույն կրթություն ստացել Երևանի Մեսրոպ Մաշտոցի անվան համալսարանում: Պռոշյան համայնքի ղեկավարն էր 2005 թվականից: Ամուսնացած էր, ուներ երկու դուստր և երկու որդի: Նա նաև Արցախյան ազատամարտի հերոսներից էր: Լեգենդար Պետրոս Ղևոնդյանի հետ անցել էր ազատամարտի բոլոր ճակատներով՝ Շահումյանից մինչև Ֆիզուլի: Հրաչ Մուրադյանը 1990 թվականից Դաշնակցության անդամ էր:
