Մուամար Քադաֆիի զորքերը պատրաստվում են լքել Միսուրատա քաղաքը, որտեղ վերջին մի քանի շաբաթների ընթացքում տեղի են ունենում բախումներ Քադաֆիի ուժերի և ապստամբների միջև: Որոշ տեղեկություններով, այստեղ արդեն զոհվել է ավելի քան 1000 մարդ, այդ թվում նաև արտասահմանցիներ:
Քաղաքը լքելու մասին հայտարարել է Լիբիայի արտաքին գործերի նախարարի տեղակալ Խալեդ Քաիմը: Այս մասին հաղորդում է France Presse գործակալությունը: Քաիմը նշել է, որ այս քայլով Քադաֆին մտադիր է տեղի ցեղերին և ցեղամիություններին հնարավորություն տալ ինքնուրույն որոշել իրենց ապագան: Եթե խաղաղություն չեղավ, ապա տեղի ցեղերը ստիպված են լինելու իրենք պայքարել ապստամբների դեմ:
Reuters գործակալությունը հաղորդում է, որ Քադաֆիի որոշումը պայմանավորված է ՆԱՏՕ-ի ռմբակոծություններով և նրան հավատարիմ ուժերի կողմից Միսուրատան գրավելու անհնարինությամբ: Բացի այդ, հայտնի է, որ Քադաֆին սկսել է զինել տեղի ցեղերին և նախապատրաստել նրանց ապստամբների դեմ պատերազմի:
