Սիրիայում ռուսական օդուժի 20 հարվածներից միջինում մեկն է ընկնում ԴԱԻՇ-ի դիրքերի ուղղությամբ: Այս մասին ասել է Մեծ Բրիտանիայի պաշտպանության նախարար Մայքլ Ֆելոնը բրիտանական Sun թերթին տված հարցազրույցում:
Նախարարը բերել է բրիտանական հետախուզության տվյալները, որոնք վկայում են, որ ռուսական օդային հարվածների մոտ 5%-ն է ուղղված ԴԱԻՇ-ի դեմ: Նրա խոսքով՝ ռմբակոծությունների մեծ մասի զոհ են դարձել խաղաղ բնակիչները և «Սիրիական ազատ բանակի» մարտիկները, որոնք պայքարում են սիրիական բանակի դեմ:
«Մենք օդային հարվածները վերլուծում ենք ամեն առավոտ: Դրանց ճնշող մեծամասնությունը ԴԱԻՇ-ի հետ ոչ մի կապ չունի: Մեր վկայությունների համաձայն՝ նրանք չկառավարվող ռումբեր են նետում շրջաններում, որտեղ խաղաղ բնակիչներ են ապրում, նրանք ռումբեր են նետում Ասադի դեմ կռվող «Սիրիական ազատ բանակի» ուժերի վրա»,- ասել է Ֆելոնը:
Նրա խոսքով՝ Պուտինը «ուժեղացնում է Ասադին և բազմապատկում տառապանքները»:
