«Ես հստակ կարող եմ ասել, որ մեր երկրում ազգաբնակչության 34 տոկոսը այսօր գտնվում է աղքատության շեմին և շեմից ցածր կարգավիճակում, հիմա այդ 34 տոկոսը պայքարում է, թե չէ` դա Gallup-ն է որոշել»,- անդրադառնալով 124 երկրում հեղինակավոր Gallup-ի անցկացրած հետազոտություններին, «Առաջին լրատվական»-ի հետ զրույցում կարծիք հայտնեց ՀՀԿ-ական պատգամավոր, ԱԺ սոցիալական հարցերի մշտական հանձնաժողովի նախագահ Հակոբ Հակոբյանը:
Հիշեցնենք, որ Gallup-ի հետազոտությունների համաձայն` Հայաստանում բնակչության 12 տոկոսը վստահ է, որ իր կյանքը բարգավաճում է, մինչդեռ 54 տոկոսը պայքարում է գոյատևման համար, իսկ 34 տոկոսը` տառապում:
Հարցին, թե համաձա՞յն է այն գնահատականին, որ Հայաստանի բնակչության 54 տոկոսը պայքարում է գոյատևման համար, Հակոբյանը պատասխանեց. «Ես կարող եմ ասել, որ 100 տոկոսն է պայքարում գոյատևման համար, նայած թե գոյատևում ասելով ինչ ենք հասկանում: Ես գոյատևում ասելով ամեն ինչ եմ հասկանում, որ իրոք մարդը պայքարում է, որպեսզի չմեռնի, մարդը ծննդյան օրվանից պայքարում է ապրելու համար, սա մարդու ապրելու սկզբունքն է` գոյատևման պայքարի իմաստը հենց սրանում է»:
