Ադրբեջանական Turan լրատվական գործակալության փոխանցմամբ՝ Ադրբեջանի նախագահ Իլհամ Ալիևն այսօր ընդունել է Հարավային Կովկասում և Վրաստանի հակամարտությունների հարցերով ԵՄ-ի հատուկ ներկայացուցիչ Հերբերտ Զալբերին։ Հանդիպման ժամանակ կողմերը քննարկել են ԵՄ-ի ու Ադրբեջանի փոխհարաբերությունները, ինչպես նաև Ղարաբաղյան հակամարտության կարգավորման հարցը։
Ալիևը հայտարարել է, որ Ղարաբաղյան հակամարտության կարգավորումը չափազանց կարևոր է տարածաշրջանային կայունության համար։ Նա հայկական կողմին մեղադրել է «ստատուս քվոն պահպանելու» ձգտման համար՝ հայտարարելով, որ դրա անհնարինության մասին իրենց ելույթներում քանիցս հայտարարել են Մինսկի խմբի երկրների նախագահները։
Հանդիպման ժամանակ քննարկվել են նաև շփման գծի վերջին իրադարձությունները, որոնց համար նույնպես Ալիևը մեղադրել է հայկական կողմին։ Խոսելով ԵՄ-ի հետ հարաբերությունների մասին՝ Ալիևը հայտարարել է, որ ԵՄ-ի մի շարք շրջանակներ «ոչ օբյեկտիվ» վերաբերմունք են ցուցաբերում Ադրբեջանի հանդեպ, ինչն «անթույլատրելի» է։
