ԱՄՆ նախագահ Բարաք Օբաման այսօր հանդես է եկել մարդու ուղեղի «քարտեզ» կազմելու ազգային լայնածավալ ծրագրի նախաձեռնությամբ: Նախնական ներդրումները հաշվարկված են 10 տարվա համար և մոտ 100 միլիոն դոլար են կազմում:
Ինչպես ասվում է Սպիտակ տան տարածած հայտարարության մեջ, ծրագրի նպատակը մեխանիզմներ մշակելն է, որոնք կօգնեն հասկանալ այնպիսի հիվանդությունների աղբյուրը, ինչպիսիք են Ալցգեյմերի և Պարկինսոնի հիվանդությունները, ինչպես նաև կնպաստեն համապատասխան դեղորայքի ստեղծմանը: Ենթադրվում է, որ ծրագիրը կներգրավի ինչպես պետական, այնպես էլ մասնավոր գիտական հիմնադրամներ:
«Այս նախաձեռնության շնորհիվ մենք հնարավորություն ունենք բարելավել աշխարհի միլիարդավոր մարդկանց կյանքը»,- հայտարարել է Օբաման ծրագիրը ներկայացնելիս, ապա ավելացրել է, որ այս ծրագիրը կօգնի բազմաթիվ աշխատատեղեր ստեղծել: Դրա հետ կապված՝ նա կոչ է արել Կոնգրեսին ընդունել այս որոշումը՝ նշելով, որ ծրագիրն իրականացնելու համար անհրաժեշտ միջոցները ներառված են բյուջեում, որը հաջորդ շաբաթ կներկայացվի ԱՄՆ վարչակազմի կողմից:
Փորձագետներն Օբամայի այս նախաձեռնությունը համեմատում են 2003 թ. ավարտված «Մարդու գենը» ծրագրի հետ, որի շնորհիվ գիտնականները կարողացան ամբողջությամբ որոշել մարդկային բոլոր գեների կառուցվածքը: