Քիշնևի ցույցերի մասնակիցները կարող են ակտիվ գործողությունների անցնել, եթե երկրի ղեկավարությունը մինչև ուրբաթ չկատարի հեռանալու վերաբերյալ ընդդիմության պահանջները։ Ցուցարարները կարող են մուտք գործել խորհրդարանի շենք կամ պիկետավորել քաղաքական գործիչների տները՝ հայտարարել է «Մեր կուսակցության» առաջնորդ Ռենատո Ուսատին՝ փոխանցում է RIA Novosti-ն։
Նա հայտարարել է, որ ընդդիմությունն ունի «Պլան Բ» այն դեպքի համար, եթե նախագահ Նիկոլայ Տիմոֆտին մինչև հանգստյան օրերը չհեռանա։ Նա չի հստակեցրել պլանի էությունը, սակայն վստահեցրել է, որ պլանի գործարկման դեպքում ամեն ինչ լավ կլինի։
Արդեն 4 շաբաթ Քիշնևում շարունակվում են ընդդիմության և քաղաքացիական հասարակության ցույցերը արտահերթ ընտրությունների անցկացման, նախագահի ու կառավարության հրաժարականի պահանջով։
