«Հայաստանի միասնությունը հայ ազգի միասնության կարիքն ունի» ակցիայի շրջանակներում Աստրախանի հայ երիտասարդները Հայոց ցեղասպանության տարելիցի նախօրեին այսօր ստորագրահավաք են սկսել բանտում գտնվող ջավախահայ քաղաքական գործիչ Վահագն Չախալյանին աջակցելու համար: Այս մասին տեղեկացնում է «Ազատություն» ռադիոկայանը:
Հիշեցնենք, որ Չախալյանը ձերբակալվել էր 2008 թ. հուլիսին Ախալքալաքի ոստիկանության պետի տան մոտ կատարված ավտոպայթյունից հետո: 2009-ին վրացական դատարանը նրան մեղավոր է ճանաչել Վրաստանի Քրեական օրենսգրքի մի շարք կետերով, այդ թվում` «զենք ու զինամթերք ձեռք բերելու եւ պահելու», «հանրային կարգը խախտող միջոցառումներ կազմակերպելու», «ոստիկանին ցույց տված խմբակային դիմադրության եւ խուլիգանության» համար` նրան դատապարտելով 10 տարվա ազատազրկման:
Ակցիան կազմակերպած Աստրախանի հայ երիտասարդները ընդգծում են, որ Չախալյանի դեմ ներկայացված մեղադրանքները կեղծ են, քանի որ Վրաստանի մարդու իրավունքների պաշտպանը նշել է, որ Չախալյանի դատավարությունը անցկացվել է խախտումներով:
Ակցիայի մասնակիցները իրենց ստորագրությունները ուղարկելու են Հայաստանի նախագահ Սերժ Սարգսյանին` կոչ անելով նրան եւս հանդես գալ Չախալյանի պաշտպանությամբ:
Ակցիայի առաջին օրը կազմակերպիչները Չախալյանի օգտին 200 ստորագրություն հավաքեցին: