Նյուքասլից 19-ամյա բրիտանացին դատապարտվել է ցմահ ազատազրկման իր նախկին քոլեջում զանգվածային սպանություն նախապատրաստելու համար: Այս մասին հայտնում է The Guardian-ը:
«Դուք ավերել եք իմ կյանքը, գթասրտություն մի սպասեք: Արմատապես չենթարկվելու ժամանակն է: Երևակայությունները կիրականանան: Այնտեղ, որտեղ եկել է միտքը, կգա մարմինը, և մարդիկ կմեռնեն, մի կասկածեք». այսպիսի խոսքեր են հայտնաբերվել պոտենցիալ մարդասպան Լայամ Լայբերդի համակարգչում: Պարբերականի տվյալներով՝ երբ ոստիկանները ձերբակալելիս են եղել նրան, նա քրքջացել է և բղավել, որ նրանց հաջողվել է մահից փրկել շատ մարդկանց:
Հաղորդվում է, որ «սառը և ոչ մարդամոտ» Լայբերդը քոլեջից հեռացվելուց հետո ժամանակի հիմնական մասը նվիրել է համակարգչային խաղերին ու համացանցին և հազվադեպ է ննջասենյակից դուրս եկել: Այնտեղ հայտնաբերվել են նրա լուսանկարները՝ զենքը ձեռքին:
Նրա մոտ հայտնաբերվել են Glock ատրճանակ, 94 փամփուշտ, ինքնաշեն ռումբեր և արցունքաբեր գազ: Իրավապահները չեն հաղորդում՝ ինչպես է նրան հաջողվել այդքան զենք հավաքել:
Լայբերդը քոլեջից հեռացվել է 2013թ.՝ անվայել վարքի համար: Նրա դատավճիռը ենթադրում է առնվազն 8 տարվա ազատազրկում: Այդ ժամկետի ավարտին նա կարող է դիմել պայմանական-վաղաժամկետ ազատ արձակման համար:
