Կիրակի օրը դադարեցնելով հացադուլը՝ «Ժառանգություն» կուսակցության առաջնորդ Րաֆֆի Հովհաննիսյանը ապրիլի 1-ից սկսել է չորսօրյա մարզային «ազգային զորահավաքային արշավը»: Ինչպես նա տեղեկացրել էր իր վերջին հանրահավաքի ժամանակ, այս արշավի ընթացքում պատրաստվում է հավաքագրել քաղաքացիների բանակ` նոր Հայաստանի ազատագրման համար:
Այսօր զորահավաքային արշավը, ժամանակացույցի համաձայն, սկսվեց Սյունիքի մարզի Կապան քաղաքից: Րաֆֆի Հովհաննիսյանը օրերս, արձագանքելով Սյունիքի մարզպետ Սուրեն Խաչատրյանի սպառնալիքներին, մարզպետին հրավիրել էր ժողովրդի առջև իր գլուխը ջարդելու՝ նրան անվանելով ստոր՝ իր հորը՝ Ռիչարդ Հովհաննիսյանին, վիրավորելու համար:
Կապանում, բարևելով քաղաքացիներին, Րաֆֆի Հովհաննիսյանը շրջեց քաղաքում: Այնուհետև Կապանի հրապարակում նա հանդես եկավ ելույթով՝ նշելով, որ Կապանը կյանք է տվել Գարեգին Նժդեհին, իսկ փետրվարի 18-ին Կապանը, Զանգեզուրն ասացին, որ ոչ մեկի ստրուկը չեն, սա իրենց քաղաքն է, որ ինքն է Նժդեհն այստեղ:
«Մենք գիտենք Կապանի իրականությունը, պաշտոնական տվյալներով՝ Կապանը հաղթեց, բայց ոչ թե 55-ը 45-ի դիմաց, այլ եթե բացեին քվեատուփերը, կտեսնեին ժողովրդի օգտին 90-ը՝ 10-ի դիմաց: Թող չքարոզեն ճշմարտության մասին, հետո Նժդեհի կենացը խմելով, հարամելով նրա հիշատակը՝ կեղծեն «Նժդեհ» ասելով: Ժողովրդի ձայնը գողանում են Նժդեհ ասելով: Նրանց տեղն ուրիշ տեղ է, պետք է տեսնեն ժողովրդի արդար դատարանը: Ես ասացի, որ ժամը 10-ին ժամադրում եմ պարոն մարզպետին: Եթե ուզում է ջարդել, հիմա ժամն է, եկեք, հիմա ժողովուրդն էլ է այստեղ: Նա այնքան ստահոդ, կեղծ բաներ ասաց իմ կյանքի հերոս Ռիչարդ Հովհաննիսյանի մասին, որ չարժե այդ մեծությունն ու դա նույն նախադասության մեջ դնել»,- ասաց Րաֆֆի Հովհաննիսյանը:
Կապանցիներից ոմանք խոչընդոտեցին հավաքին՝ ասելով, որ Րաֆֆի Հովհաննիսյանը Մեռելոցը խանգարում է: «Ժողովրդին պատասխանեք՝ ինչո՞ւ են Ձեր երեխաները ԱՄՆ քաղաքացի, թող Րաֆֆի Հովհաննիսյանը պատասխանի՝ ի՞նչ է արել այս ժողովրդի համար: Ինչպե՞ս կարող է կեղտոտ, մաշված շալվարով գալ հանրահավաքի այն մարդը, ով ցանկանում է դառնալ նախագահ: Նա իրադրությունն է ապակայունացնում: Մեզ է գյուլլան կպել, ոչ թե իր երեխաներին, որոնք ԱՄՆ քաղաքացիներ են»,- ասաց կապանցիներից մեկը:
Մի քանի տղամարդիկ ևս մոտեցան Րաֆֆի Հովհաննիսյանին՝ ասելով, որ իրենք ընտրել են Սերժ Սարգսյանին, սակայն անողնաշար չեն, ինչպես ինքն էր ասում: Նրան փորձեցին հրապարակից և քաղաքից հեռացնել՝ «հե-ռա-ցիր» վանկարկումներով: Սա «Ժառանգություն» կուսակցության ներկայացուցիչները ու նրանց համակիրները համարեցին սադրանք:
Կապանի ոստիկանության ներկայացուցիչը հայտարարեց, որ հավաքի մասնակիցները կարող են ենթարկվել պատասխանատվության, որը Րաֆֆի Հովհաննիսյանը որակեց որպես հերթական անօրինական ծանուցում: «Եթե ոստիկանությունը պետք է խախտի համերաշխությունը, որ մենք արել ենք վերջին ամիսների ընթացքում, անիրավ հրամանների համար պետք է պատասխան տան, իսկ մինչ այդ՝ ոչ մի վախ, սպառնալիք»,- ասաց Րաֆֆի Հովհաննիսյանը: Վերջինս նաև ասաց, որ Սուրեն Խաչատրյանը չհարգեց իրենց պայմանավորվածությունը, չեկավ, իր խոստումը չկատարեց, սակայն սադրիչներ ուղարկեց:
Հիշեցնենք, որ Րաֆֆի Հովհաննիսյանի մարզային հաղթարշավի ժամանակացույցը հետևյալն է՝
1 ապրիլի 2013թ. – Կապան՝ 10:00, Գորիս՝ 12:00, Սիսիան՝ 13:30, Եղեգնաձոր՝ 15:30, Արարատ՝ 17:00, Գորավան՝ 17:45, Արտաշատ՝ 18:00
2 ապրիլի 2013թ. – Եղվարդ՝ 9:30, Ուջան՝ 10:30, Թալին՝ 11:00, Արթիկ՝ 13:00, Գյումրի՝ 14:00, Արմավիր՝ 17:00, Էջմիածին՝ 18:00
3 ապրիլի 2013թ. – Աբովյան՝ 9:30, Նոր Հաճըն՝ 10:30, Մարտունի՝ 12:30, Սևան՝ 14:00, Իջևան՝ 16:00, Բերդ՝ 18:00
4 ապրիլի 2013թ. – Նոյեմբերյան՝ 10:00, Ալավերդի՝ 11:30, Վանաձոր՝ 13:00, Սպիտակ՝ 14:30, Ապարան՝ 15:30, Աշտարակ՝ 17:00
Ազատության հրապարակում նախապատրաստական հանրահավաք՝
2013թ. ապրիլի 5-ին, ժամը 18:00-ին
Նոր Հայաստանի երդմնակալության արարողությունը Ազատության հրապարակից՝
2013թ. ապրիլի 9-ին, ժամը 11:00-ից