Իրանական IRNA լրատվական գործակալության փոխանցմամբ՝ Ֆրանսիայի արտաքին առևտրի ու զբոսաշրջության դեպարտամենտի պետքարտուղար Մաթիաս Ֆեկլը երեկ հայտարարել է, որ Ֆրանսիան ողջունում է Առևտրի համաշխարհային կազմակերպությանը (ԱՀԿ) Իրանի անդամակցությունը։ Ֆեկլն այդ մասին հայտարարել է Իրանից վերադառնալուց հետո՝ Radio France Internationale-ին (RFI) տված հարցազրույցում։ Նա ընդգծել է, որ իրենք ցանկանում են երկարաժամկետ գործընկերություն հաստատել Իրանի հետ, ինչին կնպաստի ԱՀԿ-ին Իրանի անդամակցությունը, որին կողմ են իրենք։
Ֆեկլը հայտարարել է, որ հուլիսի 14-ին իրանական միջուկային ծրագրի վերաբերյալ ձեռք բերված համաձայնագիրը բացում է նոր հնարավորությունների ժամանակաշրջան՝ հիշեցնելով, որ վերջին 12 տարում Ֆրանսիայից չէր իրականացվել էկոնոմիկայի պորտֆելով նախարարական այց դեպի Իրան, և որ իրենց այս այցը տնտեսական նոր քայլ է այդ համատեքստում։
Ֆեկլն Իրան էր ժամանել ֆրանսիական տնտեսական պատվիրակության կազմում, որում ընդգրկվել են նաև 130 ֆրանսիական ընկերությունների ներկայացուցիչներ։ Ֆրանսիական պատվիրակությունն այցելել է նաև Մաշհադ քաղաք։
Հիշեցնենք. ավելի վաղ հաղորդվել էր, որ Ֆրանսիան Թեհրանում բացել է բիզնեսի զարգացման գրասենյակ։
