Հռոմի պապ Ֆրանցիսկոսը հայտարարել է, որ Հռոմեա-կաթոլիկ եկեղեցում այլևս երբեք չպետք է կրկնվեն սկանդալները` կապված անչափահասների նկատմամբ սեքսուալ ոտնձգությունների հետ: Այս մասին հաղորդում է TASS-ը:
«Ես հասկանում եմ՝ ինչպիսի ծանրությամբ է ձեզ վրա ընկած եղել վերջին տարիների ցավը, և ես աջակցում եմ ձեր մեծահոգի ցանկությանը՝ նվիրելու ձեզ զոհերի ապաքինմանը»,- ասել է քահանայապետը Վաշինգտոնում Մաթևոս առաքյալի տաճարում ամերիկացի արքեպիսկոպոսների առջև ելույթի ժամանակ: Նա հոգևորականներին գովաբանել է սեքսուալ ոտնձգությունների զոհերի հետ աշխատելու համար՝ նշելով, որ «ապաքինելով նրանց՝ մենք ևս ապաքինվում ենք»:
Ֆրանցիսկոսը առանձնացրել է խնդիրները, որոնց հետ ներկայում բախվում է կաթոլիկ եկեղեցին: Դրանց թվին են պատկանում աբորտների, պատերազմների, ահաբեկչության, թմրամոլության ու բռնության զոհերը, քաղցից կամ ռմբակոծություններից մահացող երեխաները, ջրախեղդ լինող փախստականները, տարեց կամ հիվանդ մարդիկ և այլն: Նրա խոսքով՝ նման բաների նկատմամբ չպետք է անտարբեր լինել:
