Ռուսական TASS լրատվական գործակալության փոխանցմամբ՝ «Օսկարի» համար պայքարում Ֆրանսիան կներկայացնի ծագումով թուրք Դենիզ Գամզե Էրգյուվենի «Մուստանգ» ֆիլմը։ Ֆիլմը հաջորդ տարի կպայքարի «Օտար լեզվով լավագույն ֆիլմ» անվանակարգում։
Նման որոշում են ընդունել ֆրանսիական Կինոյի ու անիմացիայի ազգային կենտրոնի հանձնաժողովի (CNC) անդամները։ 37-ամյա ռեժիսոր Էրգյուվենի ֆիլմը թուրքական ավանդական հասարակությունում սերունդների հակամարտության մասին է։
Խոսքը Թուրքիայի հյուսիսում գտնվող գյուղերից մեկում ապրող 5 դեռահաս քույրերի մասին է։ Ազատասեր դպրոցականները բախվում են տնային դաստիարակության խստությանը, որ նրանց պարտադրում են ավագ հարազատները, սակայն աղջիկները չեն ցանկանում հաշտվել դրա հետ։
