Ազատության հրապարակում երեկ մարտավարական անակնկալ տեղի ունեցավ՝ «Ժառանգություն» կուսակցության առաջնորդ Րաֆֆի Հովհաննիսյանը փոխեց տոնայնությունն ու նպատակաուղղվածությունը, վերցված ուղղության հստակությունն աճեց, և չի բացառվում նաև, որ մինչև ապրիլի 9-ը ամեն ինչ վերջանա: Այս մասին քիչ առաջ «Առաջին լրատվական»-ի հետ զրույցում ասաց 2000-2001 թվականների հայաստանյան ընդդիմադիր շարժման լիդեր, գործարար, քաղաքագետ Արկադի Վարդանյանը՝ անդրադառնալով երեկ Ազատության հրապարակում Րաֆֆի Հովհաննիսյանի նշած մարտավարական մի քանի քայլերին:
Արկադի Վարդանյանի կարծիքով՝ երկուշաբթի օրը նախատեսվող արշավը իսկապես կարելի գնահատել որպես հաղթարշավ, իսկ ինչ էլ լինի ապրիլի 9-ից հետո՝ կլինի ճիշտ, որովհետև, գործչի համոզմամբ, Րաֆֆի Հովհաննիսյանը ճիշտ ուղղությամբ է ընթանում:
«Մի պահ կարող էր թվալ, որ մարտավարությունը թուլանում է, գուցե թվում էր, որ ինչ-ինչ պայմանավորվածություններ կան իշխանության հետ, որը ես անընդունելի եմ համարում, բայց երեկվա ելույթով պարոն Հովհաննիսյանը ցույց տվեց, որ բավականին վճռականությամբ է տրամադրված: Տաս օր դեռ կա և այդ տաս օրում շատ բաներ կկատարվեն»,- ասաց Արկադի Վարդանյանը՝ չցանկանալով նախապես կանխատեսել, թե ինչ կլինի ապրիլի 9-ից հետո:
Անդրադառնալով մայիսի 5-ին կայանալիք Երևանի ավագանու ընտրություններին և այդ ընտրություններում ԲՀԿ ակտիվ մասնակցությանը՝ նա ասաց, որ ԲՀԿ-ն իր համար եղել և մնում է իշխանության թևերից մեկը, որին երբեք չի ընդունել որպես այլընտրանք: Նրա խոսքով՝ ԲՀԿ-ն օլիգարխի կողմից ղեկավարվող և փաստորեն սնվող, միայն այդ օլիգարխից բաղկացած կուսակցություն է՝ առանց գաղափարախոսության և հստակ քաղաքական ծրագրի, որոշումների և կողմնորոշման:
«Այդ կուսակցությունը չունի ոչինչ, ինչ պետք է ունենա քաղաքական կուսակցությունը: Հիշում ենք խորհրդարանական ընտրություններից հետո ամիսներ տևեցին խոսքերը՝ «Մեր խոսքը գործ է», «Մեր գործն է խոսք»: Անիմաստ բառերից բաղկացած նախադասությունները չեն կարող ընկալվել որպես քաղաքական կուսակցության գաղափարախոսություն: Իսկ այս ընտրություններին պարզապես ԲՀԿ-ի ռեսուրսները երևի թե որոշել են կենտրոնացնել գոնե քաղաքը պահելու նպատակով»,- ասաց Արկադի Վարդանյանը:
Վերջինիս կարծիքով՝ վաղուց եկել է ժամանակը, որ ԲՀԿ առաջնորդը դուրս գա քաղաքականությունից, որովհետև նախագահական ընտրություններից հետո նա դերակատարություն չունի: «Անկախ իր կամքից՝ ինքն արդեն քաղաքականությունից դուրս եկած մարդ է: Նա քաղաքական ֆիգուր չէ, ինչպես և չի էլ եղել, նա ուղղակի դրածո ֆիգուր է, շատ լավ գիտենք՝ ում կողմից դրված, նա չի կարող լինել ոչ ընդդիմադիր, ոչ այլընտրանքային: Նրա հայտնվելը քաղաքական դաշտում նպատակ էր հետապնդում առանց այն էլ թույլիկ ընդդիմադիր դաշտը վերջնականապես փլուզել և վերացնել, ինչը նրանց ինչ-որ առումով հաջողվեց»,- եզրափակեց իր խոսքն Արկադի Վարդանյանը:
Լուսանկարը՝ PanARMENIAN Photo-ի