Բաղրամյան պողոտայի վերջին հանրահավաքը ցրելու «նոր տեխնիկան», երբ ոստիկանները «պարելով» էին ճեղքել ակտիվիստների շղթան, բուռն քննարկվեց համացանցում։ Եթե նախկինում ջրցանի ու բռնության կիրառումը քննադատության էր արժանանում, ապա այս նոր մեթոդը ծաղրվեց։ «Առաջին լրատվական»-ը ոստիկանապետ Վովա Գասպարյանից հետաքրքրվեց՝ ինչո՞ւ որոշեցին այս անգամ հանրահավաքը ցրել նոր մեթոդով՝ «պարով», և ոչ թե նախկինի պես՝ ջրցան մեքենաներով ու բռնությամբ։ Գասպարյանը հակադարձեց, թե դրանի՞ց էլ ենք դժգոհ: «Դե՛, լողանալուց հետո պետք է մի քիչ էլ պարել: Նորմալ ա: Դրանից էլ եք դժգո՞հ…. Խաղաղվե՛ք էսօր, հա, էսօր տոն ա: Ամեն օր քաղաքականության մեջ եք, մի քիչ դո՛ւրս եկեք քաղաքականությունից»,- դիմեց ոստիկանապետը։
Իսկ ինչո՞վ է զբաղված ոստիկանությունը, պատրաստվո՞ւմ են առաջիկա ընդվզումների ալիքին։ Սահմանադրական փոփոխությունների դեմ «Ոչ»-ի ճակատը պայքար է սկսելու, ինչպե՞ս են պատրաստվում հանրահավաքները ցրել, կրկին պարելո՞վ։ Ոստիկանապետն ավելի «կրեատիվ» գտնվեց, ծիծաղելով շտկեց՝ երգելով: «Եթե կլինի օրենքի սահմաններում, կգնա խաղաղ: Չի լինի օրենքի սահմաններում՝ կպարենք: Ոստիկանները ոչ միայն պարելով են ցրելու հանրահավաքը»,- զգուշացրեց Գասպարյանը։ Մեր դիտարկմանը՝ ինչպե՞ս, պատասխանեց՝ երգելով: Հետաքրքրվեցինք՝ սահմանադրական փոփոխությունների վերաբերյալ ի՞նչ կարծիք ունի ոստիկանապետը։ «Ինձանից լավ կարծիքներ հայտնողներ կլինեն»,- ասաց նա:
Դիտարկմանը, թե ընդդիմադիրներն ասում են՝ իշխանության վերարտադրման նպատակով է, ասաց՝ ընդդիմադիրներն ինչ ուզում, ասում են։
