Այսօր Շիրակի մարզի ընդհանուր իրավասության դատարանում՝ դատավոր Վարդան Գրիգորյանի նախագահությամբ, շարունակվեց Գյումրիի պետական մանկավարժական ինստիտուտի ռեկտոր Վարդևան Գրիգորյանի եղբոր` Հարություն Գրիգորյանի սպանության գործով դատաքննության հերթական նիստը:
Հիշեցնենք, որ Գյումրու պետական մանկավարժական ինստիտուտի ռեկտոր Վարդևան Գրիգորյանի եղբայրը` Հարություն Գրիգորյանը, սպանվել է 2014թ. հուլիսի 24-ին` Շիրակի մարզի Գետք գյուղի մոտակայքում գտնվող լքված անասնագոմում: Ըստ պաշտոնական մեղադրանքի՝ սպանությունը կատարելու մեջ մեղադրվում է Շիրակի մարզի ռազմական ոստիկանության քրեական հետախուզության նախկին պետ Արման Կատունյանը: Մեղադրանքն առաջադրվել է ՀՀ ՔՕ 104-րդ հոդվածի հատկանիշներով, ապա արդեն վերաորակման արդյունքում՝ 105-րդ հոդվածի հատկանիշներով:
Դատական նիստի ժամանակ, դատակոչման ցուցակով նախատեսված վկաների հարցաքննությունից հետո դատավոր Վարդան Գրիգորյանի որոշմամբ հարցաքննության հրավիրվեց ամբաստանյալ Արման Կատունյանը: Վերջինս, օգտվելով ցուցմունք չտալու իր օրինական իրավունքից, հրաժարվեց դատարանում ցուցմունք տալուց, որով պայմանավորված էլ դատարանը որոշեց հրապարակել նրա նախաքննական ցուցմունքները:
Ըստ ամբաստանյալի նախաքննական ցուցմունքների՝ նա Հարություն Գրիգորյանին ճանաչում է փոքր հասակից, նրա ընտանիքի հետ ունեցել է նորմալ հարաբերություններ: Հարություն Գրիգորյանն ընկերություն է արել իր հանգուցյալ հոր ու հորեղբոր հետ: Ինքն էլ նորմալ է եղել Հարությունի հետ, սակայն վերջին տարիներին է ավելի ընկերացել նրա հետ, չնայած նա տարիքով ավելի մեծ է:
Ըստ ցուցմունքների՝ 2012 թվականի ընտրությունների ժամանակ Հարությունը ինչ-որ կազմակերպչական աշխատանքներ է իրականացրել և խնդրել է Արմանին օգնել իրեն: «Սակայն աշխատանքի բերումով ես չէի կարող օգնել իրեն: Նանան այդ ժամանակ աշխատանք չուներ: Ես առաջարկեցի, որ Նանան օգնի իրեն»,- նշված է ամբաստանյալի ցուցմունքում:
Կատունյանի նախաքննական ցուցմունքում նաև նշված էր, որ սկսած 2014 թվականի փետրվարից Հարություն Գրիգորյանը իր ընտանեկան կյանքը վերածել է դժոխքի, երբ մտերմանալով իր ընտանիքի հետ՝ սկսել է սիրահետել կնոջը` Ջեմմա Խաչատրյանին: Նույնիսկ մի քանի անգամ այդ թեմայով հանդիպել է Հարություն Գրիգորյանի հետ՝ հարաբերություններ պարզելու նպատակով: Մի անգամ էլ Հարությունն ասել է, որ սիրում է Ջեմմա Խաչատրյանին, և առաջարկել է, որ երկուսն էլ իրենց կրակեն, ու Նանան այսինքն՝ Ջեմման, ոչ մեկին չհասնի:
Դեպքի օրը` 2014 թվականի հուլիսի 24-ի առավոտյան, ժամը 10-ի սահմաններում Արման Կատունյանի բջջային հեռախոսին է զանգահարել Հարություն Գրիգորյանը և հանդիպման է հրավիրել գյուղ Աղին՝ ասելով, թե ապացուցելու է իր ու Ջեմմայի կապը: Արմանը հրաժարվել է հասնել Աղին և առաջարկել է հանդիպել Գյումրիի սկզբնամասում կամ քաղաքի մերձակայքում: Հանդիպման ընթացքում Հարություն Գրիգորյանը եղել է բավական տարօրինակ պահվածքով ու անադեկվատ կեցվածքով, խոսել է ինչ-որ թուղթուգրից, որի պատճառով ինքը նիհարում է ու չի կարողանում նորմալ ապրել: Այդ ասելիս նա մի քանի անգամ բացել է փորն ու ճանկռել, իջեցրել ու բարձրացրել շալվարը կոճկած վիճակում:
Բուն սպանության դրվագից, ըստ նախաքննական ցուցմունքների, ամբաստանյալը ոչինչ չի հիշում: Հիշում է միայն, որ հանդիպման ժամանակ Հարություն Գրիգորյանն իր կնոջ, մոր ու զավակների հասցեին սեռական բնույթի հայհոյանքներ է տվել, ու ինքն արդեն շոկի մեջ չի հիշում ոչ մի բան: Միայն այն պահին է ուշքի եկել, երբ կինը իրեն ցնցել է ու ճչալով խնդրել, որ ինչ-որ բան խոսի:
Միաժամանակ նշված է, որ սպանության օրը հատել է վրացական սահմանը, ընտանիքին էլ հանձնել է ընկերոջ խնամքին ու խնդրել պահել Ռուսաստանում: Ապա արդեն, երբ լրատվական կայքերի միջոցով հասկացել է, թե ինչ է եղել, հետ է վերադարձել ու ներկայացել ոստիկանություն:
Ամբաստանյալի նախաքննական ցուցմունքների հրապարակումից հետո դատարանը մինչ հաջորդ փուլին անցնելը խորհրդակցեց կողմերի հետ: Օգտվելով իր իրավունքից՝ տուժողի իրավահաջորդի շահերի պաշտպան փաստաբան Լիպարիտ Սիմոնյանը միջնորդություն ներկայացրեց ևս երեք վկայի դատակոչման համար, որը դատարանը բավարարեց: Դատարանը նաև հստակեցրեց, որ փաստաբան Սիմոնյանի մյուս միջնորդությունը` ամբաստանյալին կրկնակի դատահոգեբուժական փորձաքննության ենթարկելու վերաբերյալ, առայժմ հետաձգվում է, մինչ նոր ներգրավված վկաների հարցաքննության ավարտը:
Դատական նիստը հետաձգվեց, մինչև հոկտեմբերի 2-ը:
