Բուդապեշտը Զագրեբին մեղադրել է միջազգային օրենսդրության խախտման և մարդկանց անօրինական փոխադրման մեջ՝ այն բանից հետո, երբ Խորվաթիայից Հունգարիա է ժամանել ներգաղթյալներով գնացք՝ մոտ 40 խորվաթ ոստիկանների ուղեկցությամբ։ Այս մասին հայտնում է BBC-ն։
Հունգարիայի իշխանությունները նշում են, որ փախստականները գրանցված չեն եղել Խովաթիայում, և գնացքը ժամանել է առանց նախնական ծանուցման։
Ոստիկաններին զինաթափել են և հետ ուղարկել, իսկ ներգաղթյալներին ուղարկել են Ավստրիա, որի իշխանություններն իրենց հերթին հայտարարել են, որ իրենց հետ այդ հարցը չի քննարկվել։
Ավելի վաղ Խորվաթիայի վարչապետ Զորան Միլանովիչը հայտարարել էր, որ Զագրեբը չի դառնա փախստականների ընդունման կենտրոն և հետ կուղարկի երկիր ժամանող ներգաղթյալներին։
Վերջին օրերին Խորվաթիայի տարածք է ոտք դրել ավելի քան 14 հազար մարդ։
Սեպտեմբերի 23-ին նշանակված է ԵՄ արտահերթ գագաթնաժողով, որի գլխավոր թեման կդառնա ներգաղթյալների հոսքին առնչվող իրավիճակը։
