Այսօր Ազատության հրապարակում «ժառանգություն» կուսակցության առաջնորդ Րաֆֆի Հովհաննիսյանը հայտարարեց, որ կիրակի օրը կդադարեցնի հացադուլը, սակայն միտք չունի հանգիստ նստելու, շարունակելու է իր հաղթարշավը. «Ավարտելու եմ և առանց կազդուրման ձեզ հետ և համայն հայության հետ ՀՀ-ի բոլոր քաղաքացիների, Արցախի, Սփյուռքի հետ պատրաստվելու ենք ապրիլի 9-ին»:
Րաֆֆի Հովհաննիսյանը վաղվա համերգից հետո Տեր Գրիգոր քահանայի կողմից պատարագից բերված հաղորդություն կստանա, իսկ կիրակի օրը՝ Սուրբ Հարության Ավետիսի առավոտյան, ելույթ կունենա հրապարակում և ընտանիքի հետ կգնա եկեղեցի և ամբողջ օրը կմնա ընտանիքի հետ: Երկուշաբթի օրը՝ ապրիլի մեկին, մեռելոց է.«Այդ օրը պետք է հիշենք մեր մեծերին, զինվորներին, նահատակներին, նաև պետք է ծիծաղենք, ուժեղանանք, որովհետև գործի ենք անցնելու, սահմանից սահման բոլոր մարզերում քաղաքացիական բանակ ենք հավաքելու՝ ապրիլի 9-ի համար»:
Նա առաջինը գնալու է Կապան, այնուհետև՝ Գորիս, Սիսիան, Եղեգնաձոր, Արարատ, Գոռավան, Արտաշատ:
Երեքշաբթի օրը Րաֆֆի Հովհաննիսյանը առավոտյան 09.30 կլինի Եղվարդում, այնուհետև՝ Ուջանում, Արթիկում, Գյումրիում, Արմավիրում և Էջմիածնում:
Չորեքշաբթի օրը 09.30 այցելությունները կշարունակվեն Աբովյանում, Նոր Հաճնում, Մարտունիում, Սևանում, Իջևանում և Բերդում /18.00/:
Հինգշաբթի օրը ուղին կշարունակվի Տավուշի մարզում, այցելություն Նոյեմբերյան, Ալավերդի, Վանաձոր, Սպիտակ, Ապարան և Աշտարակ:
Վերջում Րաֆֆի Հովհաննիսյանն ասաց, որ հաջորդ հավաքը, որը լինելու է առաջիկա շաբաթվա ամփոփումը, լինելու է լեցուն հարթակի վրա. «Ես հավատաքննիչ չեմ, մեր ժողովուրդն այսօր հարյուր հազարներով կայքերում է հետևում, իսկ Ազատության հրապարակը ներվային կենտրոնն է, բայց իրենք կտեսնեն, որ ժողովուրդը գալու է և պահանջելու մեր իրավուքն ու հաղթանակը»:
