Սիրիայի ռազմաօդային ուժերը հինգշաբթի զանգվածային հարվածներ են հասցրել Ռաքա նահանգում ԴԱԻՇ-ի ահաբեկիչների բազաների ուղղությամբ: Այս մասին հայտնում է «Ադ-Դիյար» թերթը իր էլեկտրոնային տարբերակում: Թերթի տվյալներով՝ 11 հարձակում է իրականացվել հակառակորդի ճամբարների և դիրքերի վրա: Ոչնչացվել են մեծ թվով ջիհադիստներ, շարքից հանվել են նրանց մարտական տեխնիկան և տրանսպորտային միջոցները:
Սիրիայի զինված ուժերի հրամանատարությունը օդուժ է օգտագործել նաև Պալմիրայի արվարձաններում: «Ադ-Դիյար»-ի տեղեկությամբ՝ այնտեղ «Ջեզալ» նավթահանքի վրա կործանիչներից մեկը վթարվել է կամ խփվել գրոհայինների կողմից: Նավթահանքի շուրջը մի քանի օր դաժան մարտեր են ընթանում կառավարական ուժերի և ԴԱԻՇ-ի միջև:
Սիրիայի հարավային Բոսրա-էշ-Շամ քաղաքում սիրիական ուղղաթիռները գրոհել են ավազակախմբերի շտաբը, երբ այնտեղ դաշտային հրամանատարների խորհրդակցություն էր անցկացվում: Գրոհայինները խոստովանել են, որ կորուստներ ունեն: Սպանվել է 18 գրոհային:
Ամենաթեժը, ինչպես նախկինում, հյուսիսարևմտյան ճակատն է: Սիրիական բանակին այնտեղ դիմակայում է «Ջեյշ ալ-Ֆաթհ» իսլամիստական խմբավորումների կոալիցիան: Գրոհայինների շարասյուների ուղղությամբ հարվածելու համար կիրառվել է օդուժ: Ռազմական աղբյուրները հայտնել են 19 արմատականի ոչնչացման մասին:
SANA տեղեկատվական գործակալության հաղորդմամբ՝ Լաթաքիայի նավահանգստից հյուսիս-արևելք հինգշաբթի սպանվել և վիրավորվել է 37 ահաբեկիչ:
