Բարձրահասակ մարդիկ ավելի հազվադեպ են ենթակա ճարպակալման ռիսկին: gazeta.ru-ի հաղորդմամբ՝ այսպիսի եզրակացության են եկել եվրոպացի գիտնականները:
Հաղորդվում է, որ կատարվել է եվրոպական տարբեր պոպուլյացիաներ ներկայացնող մարդկանց գենետիկ հետազոտություն: Պարզվել է՝ բարձր հասակը և լավ կազմվածքը գենետիկորեն կապված են:
Հետազոտությանը ներգրավվել է 9416 մարդ եվրոպական 14 երկրից: Գենետիկներին հաջողվել է պարզել, թե ինչու Սկանդինավյան երկրների բնիկները միջինում ավելի բարձրահասակ և բարեկազմ են, քան եվրոպական այլ երկրների ներկայացուցիչները:
Պարզվել է՝ բարձր հասակի և լավ կազմվածքի համար պատասխանատու գեները կապված են իրար հետ և հանդիպում են, որպես կանոն, Հյուսիսային Եվրոպայի երկրների բնակչության շրջանում: Հետազոտության հեղինակների պնդմամբ՝ ազգերի հետագա գենետիկ ուսումնասիրությունները կօգնեն հասկանալ՝ հատկապես որ գեներն են պատասխանատու դիաբետի, ծերունական թուլամտության կամ սրտանոթային հիվանդությունների առաջացման համար, քանի որ նման առողջական խնդիրները հաճախ ավելի բնորոշ են լինում որոշակի երկրի բնակչության:
