Իրանական IRNA լրատվական գործակալության փոխանցմամբ՝ Արակում ծանր ջրով գործող իրանական ռեակտորի վերակառուցմանը կմասնակցեն «վեցյակի» մեջ մտնող երկրներից երկուսի մասնագետները։ Այս մասին այսօր Թեհրանում բժշկական ընկերությունների ներկայացուցիչների առջև ունեցած ելույթում հայտարարել է Իրանի նախագահ Հասան Ռուհանին:
«Իրանի հետ համագործակցությամբ Արակի ռեակտորի արդիականացմանը մասնակցելու են «վեցյակի» հետ երկրներից երկուսի մասնագետները»,- ասել է Իրանի նախագահը։
Ռուհանին չի մանրամասնել, թե որ երկու երկրների մասին է խոսքը, որոնց մասնագետները մասնակցելու են տվյալ աշխատանքներին։ Նա հայտարարել է, որ միջուկային գործարքի դրույթներին համապատասխան՝ ուղղումներ պետք է արվեն Արակի ռեակտորի կառուցման մեջ, և այն սկսելու է արտադրել ռադիոիզոտոպներ՝ բժշկական ու արդյունաբերական կարիքների համար։
