Այսօր Գյումրիում բավական տարօրինակ վիճակ էր ստեղծվել: Գաղտնիք չէ, որ քաղաքում կոմունալ վճարների մուծումն առաջնահերթ տեղ է գրավում, և տվյալ ամսվա թոշակ-նպաստի հետ միաժամանակ գրեթե նույն օրերին կատարվում են կոմունալ վճարումները: Սակայն որքան մեծ եղավ գյումրեցիների զարմանքը, երբ այսօր քաղաքի մի շարք առևտրային բանկերի տեղի գրասենյակների աշխատակիցները գյումրեցիներին հայտարարեցին, որ հոսանքի վարձերի տվյալները ՀԷՑ-ը դեռ չի տրամադրել ու մինչև ամսվա վերջ չի լինի, քանի որ սակագինը դեռ հստակեցված չէ: Ու այլևս ոչ մի հստակեցում:
Այսինքն՝ եթե հանրապետության մակարդակով ասվում է, որ հոսանքի գինը չի թանկանալու, սուբսիդավորման համար վաճառված Որոտանի կասկադի արժեքն է ներդրվում և այլն՝ դա դեռ հեչ, որ երկու շաբաթ գրեթե ողջ Հայաստանը պառկեց ասֆալտին, որպեսզի հոսանքը չթանկանա՝ դա էլ հեչ, ու հիմա պարզվում է, որ պարոն Բիբինի գլխավորած հիմնարկը դեռ չի հստակեցրել հոսանքի սակագինը և չի տալիս տվյալներ, որպեսզի վճարումներ կատարվեն:
Ի՞նչ կարող է սա նշանակել. արդյոք ռուսական ընկերությունը մոռացա՞վ, որ խոսքը Հայաստանի ամենից ըմբոստ քաղաքի մասին է, որը կարողացավ նույնիսկ Պուտինին ստիպել ցավակցել՝ հունվարին մեկ բռունցք դառնալով: Արդյոք ռուսական ընկերությունը մոռացա՞վ, որ Գյումրիում ցանկացած պահի կարող է իրավիճակը դուրս գալ վերահսկելիության սահմաններից, ու ցանկացած պահի կարող է պաշարվել հյուպատոսարանն ու ռազմաբազան: Գյումրեցիները համբերատար ժողովուրդ են, առավել ևս ռուսների հանդեպ, սակայն արդեն մեկ անգամ այդ համբերությունը հատվեց հունվարին:
Ի դեպ, հիշեցնենք, որ երեք շաբաթից Գյումրիում սկսվելու են աննախադեպ մեծ ցույցեր՝ ընդդեմ սահմանադրական փոփոխությունների: Ով իմանա՝ գուցե մեծ փոփոխությունները սկսվեն հենց Գյումրիից: Ամեն դեպքում ռուսները այս դեպքում իրենց ձեռքով իրենց աչքն են հանում:
