TRT-Russian կայքի փոխանցմամբ, Թուրքիայի արտգործնախարարության խոսնակ Սելչուք Ունալը հայտարարել է, որ Անկարան շարունակում է իր ինտենսիվ շփումները Վաշինգտոնի հետ` կապված ապրիլի 24-ին Հայոց ցեղասպանության մասին ԱՄՆ նախագահ Բարաք Օբամայի ավանդական ելույթի հետ.
«Մենք հուսով ենք, որ ամերիկյան վարչակազմն անկողմնակալ դիրքորոշում կորդեգրի, ինչը կհամապատասխանի երկու երկրների միջև գոյություն ունեցող երկկողմանի հարաբերությունների բարձր մակարդակին: Հայաստանը ցայժմ մեզ պատասխան չի տվել պատմաբանների համատեղ հանձնաժողովի ստեղծման շուրջ մեր առաջարկին:
Ինչ վերաբերում է այդ օրն Իրանում Հայոց ցեղասպանության մասին պատմող ֆիլմի ցուցադրությանը, որում, շրջանառվող լուրերի համաձայն, ներկա են գտնվելու նաև մի շարք իրանական քաղաքական գործիչներ, ապա Թուրքիան անհրաժեշտ նախաձեռնություններ ձեռնարկել է դա կանխելու համար: Իրանական իշխանությունները մեզ հայտնել են, որ ոչ մի դեպքում չեն աջակցի այդպիսի նախաձեռնություններին:
Նույնը կարելի է ասել Շվեյցարիայի Ժնև քաղաքի մասին, որի քաղաքապետարանը թույլատրել է կառուցել Հայոց ցեղասպանության զոհերի հիշատակի հուշարձան: Շվեյցարական պաշտոնական իշխանությունները որևէ կապ չունեն դրա հետ»:
Հիշեցնենք, որ Թուրքիայի արտգործնախարար Ահմեթ Դավութօղլուն բազմիցս հայտարարել է, որ իրենք թույլ չեն տա Հայոց ցեղասպանության թեման Դամոկլյան սրի նման շարունակ ճոճել թուրք-ամերիկյան հարաբերությունների վրա:
