Այսօր «Ժառանգություն» կուսակցության առաջնորդ Րաֆֆի Հովհաննիսյանի հայտարարած հացադուլի 17-րդ օրն է: Ավանդույթի համաձայն՝ այսօր ևս առավոտյան նա տիկնոջ և ՌԱՀՀԿ նախագահ Մանվել Սարգսյանի հետ շրջեց Ազատության հրապարակում և վերադարձավ իր հացադուլի վայրը:
Րաֆֆի Հովհաննիսյանի վրանի մոտ հավաքված քաղաքացիները մտքեր փոխանակեցին նրա և տիկնոջ՝ Արմինե Հովհաննիսյանի հետ: Նրանցից ոմանք «Առաջին լրատվական»-ի հետ զրույցում նշեցին, որ այսպես շարունակել այլևս հնարավոր չէ, և հույսը տեսնում են Րաֆֆի Հովհաննիսյանին որպես ՀՀ նախագահ ընտրելու մեջ:
Րաֆֆի Հովհաննիսյանի համակիրներից մեկի կարծիքով՝ շատ ճիշտ կլիներ կազմակերպել արտահերթ նախագահական ընտրություններ, քանի որ, իր համոզմամբ, ընտրությունները կեղծվել են, իսկ ՀՀ գործող նախագահ Սերժ Սարգսյանը միտք չունի կազմակերպել նոր նախագահական ընտրություններ:
«Առաջին լրատվական»-ի հետ զրույցում «Ժառանգություն» կուսակցության քարտուղար Ստեփան Սաֆարյանն անդրադարձավ ՀՀ գործող նախագահ Սերժ Սարգսյանի՝ «Ժառանգության» առաջնորդին ուղղված հրապարակային նամակին: Նա կարծիք հայտնեց, որ իրեն չի հետաքրքրում այդ նամակի ձևական մասը, այլ հետաքրքրում է սկզբունքային և բովանդակային հիմքը:
Ըստ նրա՝ բանակցություններն իսկապես անհրաժեշտ են, որպեսզի ժողովրդի որոշումը տեղ հասնի: Հարցին՝ եթե Րաֆֆի Հովհաննիսյանն ընդունի Սերժ Սարգսյանի առաջարկը՝ նստելու բանակցային սեղանի շուրջ, դա չի՞ նշանակում, որ նա հակասում է նախկինում արած իր հայտարարությանը՝ «Սերժ Սարգսյանը երդմնակալության կգնա իմ դիակի վրայով», պատասխանեց, թե չի կարծում, որ դա որպես հակասություն կդիտվի: Նրա համոզմամբ՝ բանակցություններ, այնուամենայնիվ, պետք են:
Մանրամասները դիտեք տեսանյութում:
