Երկու ահաբեկչություններ կատարած, որոնց զոհ էր գնացել ընդհանուր առմամբ 77 մարդ, և 21 տարվա ազատազրկման դատապարտված «նորվեգացի հրձիգ» Անդերս Բերինգ Բրեյվիկը կդառնա The Events մյուզիքլի հերոսը: Այն կբեմադրվի բրիտանացի գրող Դեյվիդ Գրեյգի պիեսի հիման վրա: Այս մասին հայտնում է բրիտանական The Observer պարբերականը:
Թերթը նշում է, որ Գրեյգը Բրեյվիկի կազմակերպած արյունալի սպանդից 3 ամիս անց այցելել է Ուտոյա կղզի: Նրա հետ է եղել նաև ռեժիսոր Ռամին Գրեյը:
The Events ներկայացման պրեմիերան տեղի կունենա Էդինբուրգի Traverse Theatre-ում, որից հետո այն կցուցադրվի լոնդոնյան Young Vic թատրոնում:
Գրեյգի պիեսի գլխավոր հերոսը կին է, որը փորձում է որոշել, թե ինչպես պետք է արձագանքել զանգվածային սպանություններին, որոնք կատարվել են քաղաքական ու ռասայական ատելության հողի վրա:
Գրեյգն ու Գրեյը զրուցել են սպանվածների ազգականների ու ընկերների հետ ու եկել այն եզրակացության, որ Բրեյվիկի անունը չպետք է հիշատակվի:
Գրողը հույս ունի իր պիեսով ցույց տալ, թե վերջին 2 հազար տարում որքանով է փոխվել հասարակությունը:
Ներկայացման երաժշտությունը կգրի կոմպոզիտոր Ջոն Բրաունը: Ակնկալվում է, որ կլինեն երգչախմբային պարտիաներ:
