Նախօրեին ՌԴ նախագահ Վլադիմիր Պուտինը ստորագրել է հրամանագիր Իվան Վոլինկինին Հայաստանում Ռուսաստանի արտակարգ և լիազոր դեսպան նշանակելու մասին: Վերջինս զբաղեցնում է Ռուսաստանի արտգործնախարարության քարտուղարության ղեկավարի տեղակալի պաշտոնը: Ռուսաստանի ԱԳ նախարարության բարձրաստիճան այս դիվանագետը, սակայն, մինչ ԱԳ նախարարության կենտրոնական ապարատում պաշտոնի ստանձնումը հասցրել է վտարվել Վրաստանից:
2007թ. Վրաստանում աղմկահարույց դիվանագիտական սկանդալի արդյունքում պաշտոնական Թբիլիսին Վրաստանում Ռուսաստանի Դաշնության դիվանագիտական առաքելության երեք ներկայացուցիչների մեղադրեցին իրենց դեմ դավադրություն կազմակերպելու, լրտեսության մեջ: 2007թ. նոյեմբերի 7-ին Վրաստանի ներքին գործերի նախարարությունը հրապարակել էր աուդիո- և վիդեոնյութեր այն մասին, թե ինչպես են Վրաստանում ՌԴ դիվանագիտական ներկայացուցչության 3 դիվանագետները համագործակցում ընդդիմության ներկայացուցիչների՝ Գեորգի Խաինդրավայի, Կոնստանտին Գամսախուրդիայի, Շալվա Նաթելաշվիլիի, Լևան Բերձենիշվիլիի հետ՝ այն ժամանակ, երբ Վրաստանում իշխանության և ընդդիմության միջև հարաբերությունների լարվածությունը հասել էր իր գագաթնակետին: Վրաստանի արտգործնախարարությունը երեք դիվանագետների, այդ թվում՝ Իվան Վոլինկինին հայտարարեց «պերսոնա նոն գրատա», ինչի արդյունքում Վոլինկինի հետ Վրաստանը ստիպված եղան լքել Վրաստանում ՌԴ դեսպանատան խորհրդական Պյոտր Սոլոմատինը և դեսպանատան երրորդ քարտուղար Ալեքսանդր Կուրենկովը:
Ռուսաստանի արտգործնախարարությունը մերժեց վրացական պնդումները՝ դրանք սադրանք որակելով: Ի պատասխան Վրաստանի արտգործնախարարության այդ քայլի՝ Ռուսաստանը ՌԴ-ից վտարեց վրացի երեք դիվանագետների: Ինքը՝ Իվան Վոլինկինը, ռուսական լրատվամիջոցներից մեկի հետ զրույցում հերքել էր իրեն վերագրվող մեղադրանքները: Նա հայտարարել էր, որ ինքն ազնիվ է աշխատել՝ այնպես, ինչպես դիվանագետները պետք է աշխատեն քաղաքական բոլոր գործիչների ու քաղաքական բոլոր ուղղությունների ներկայացուցիչների հետ: Վոլինկինն ասել էր, որ Վրաստանի սահմանադրության դեմ ոչինչ չի արել, ավելին՝ հույս էր հայտնել, որ թյուրիմացությունը շուտով կհարթվի:
«Առաջին լրատվական»-ը փորձեց այս աղմկահարույց սկանդալի մասին մանրամասներ պարզել վրացի փորձագետներից ու քաղաքական վերլուծաբաններից, որոնք բոլորը խուսափեցին այս հարցի շուրջ իրենց հիշողությունը թարմացնելուց՝ միգուցե չցանկանալով լույս սփռել ռուս-վրացական հարաբերությունների այս մութ էջի վրա այն ժամանակ, երբ Վրաստանի նոր իշխանությունները փորձում են կարգավորել իրենց հարաբերությունները հարևան Ռուսաստանի հետ:
Լուսանկարում՝ Իվան Վոլինկինը՝ ձախից առաջինը
