«Հայոց համազգային շարժում» կուսակցության ներկայացուցիչների երկրորդ այցը Բաղրամյան 26 անհետևանք չմնաց։ Կուսակցության հիմնադիրներից մեկը՝ Կարապետ Ռուբինյանը, որը հիմա բնակվում է Լիբանանում, այս անգամ ուղղակի լքեց կուսակցությունը։ Նա այս մասին գրել է ֆեյսբուքյան իր էջում։
Ընդդիմադիր համարվող կուսակցության ղեկավար կազմի և Սերժ Սարգսյանի գարնանային հանդիպման վերաբերյալ Ռուբինյանը դարձյալ կոշտ էր արտահայտվել՝ նշելով, որ որոշումն ընդունել են առանց վարչության անդամների կարծիքը հարցնելու։ Ռուբինյանն իր այսօրվա գրառման մեջ մասնավորապես նշել է. «Կրկին մամուլի հրապարակումներից տեղեկացա, որ ՀՀՇ ղեկավարները նորից հանդիպման են գնացել սպանությունների, բռնությունների ու զանգվածային քաղաքական հալածանքների միջոցով երկրում իշխանությունը յուրացրած Սերժ Սարգսյանի հետ և, ի թիվս այլ կուսակիցների, նաև իմ անունից նրա հետ քննարկել են «սահմանադրական բարեփոխումների» խնդիրը:
Կրկին ու ցավով պետք է արձանագրեմ, որ ՀՀՇ համագումարը, խորհուրդը կամ վարչությունը իրենց որոշումներով չեն լիազորել Բաղրամյան 26 այցելածներին՝ ներկայացնելու կուսակցության դիրքորոշումը խնդրի վերաբերյալ այն պարզ պատճառով, որ չեն քննարկել նման հարց:
ՀՀՇ ղեկավարների նման գործելաոճը կոպտորեն ոտնահարում է կուսակցության անդամների` հարցեր քննարկելու ու որոշումների կայացմանը մասնակցելու իրավունքը և խորը հակասության մեջ է այն սկզբունքների հետ, որոնց շուրջ պայմանավորվել էինք հիմնադիրներով, երբ ընդվզեցինք Հայաստանի նորագույն պատմության մեջ առանցքային դերակատարություն ունեցած այս կուսակցությունը մեկ անձի քմահաճույքով լուծարելու դեմ և վերաբացեցինք այն:
Ստեղծված իրավիճակում, երբ ի հեճուկս առաջին հանդիպման առիթով հրապարակավ հայտնած իմ անհամաձայնության ու բողոքի` ընդդեմ որդեգրված հակաժողովրդավարական գործելաոճի, համառորեն կրկնվում է նույնը, ստիպված եմ հայտարարելու Հայոց համազգային շարժում կուսակցությանը իմ անդամակցությունը դադարեցնելու մասին»:
Այս գրառումից դեռևս տեղյակ չեն Կարապետ Ռուբինյանի կուսակիցները։ Քիչ առաջ կուսակցության ղեկավար Արարատ Զուրաբյանը, որը երեկ Բաղրամյան 26-ից դուրս էր եկել բավականին բարձր տրամադրությամբ, «Առաջին լրատվական»-ի հետ զրույցում հայտնեց, որ տեղյակ չէ այդ մասին։ Մեզանից տեղեկանալուց հետո ասաց, որ ինքը ավելացնելու բան չունի: «Որևէ մեկնաբանություն անելու ցանկություն չունեմ։ Դա Կարապետ Ռուբինյանի սուբյեկտիվ մոտեցումն է, որը հարգում եմ, իր իրավունքն է, ավելացնելու բան չունեմ»,- սահմանափակվեց կուսակցության ղեկավարը։ Հարցին ի պատասխան, թե իրականում քննարկե՞լ էին վարչության անդամների, Կարապետ Ռուբինյանի հետ հարցը, Զուրաբյանը չցանկացավ շարունակել զրույցը։
Ի դեպ, երեկ՝ Սերժ Սարգսյանի հետ հանդիպումից հետո, Ալիկ Արզումանյանից հետաքրքրվել էինք՝ քննարկե՞լ են վարչության նիստում որոշումը, այդ թվում Կարապետ Ռուբինյանի հետ՝ հաշվի առնելով վերջինիս վերաբերմունքը նախորդ հանդիպման վերաբերյալ, Արզումանյանն ասել էր. «Ինքը տեղյակ է, որ մենք գալու ենք։ Մենք ասել ենք՝ մենք լիբերալ կուսակցություն ենք, որտեղ հավաքված են ազատամիտ մարդիկ, ու բոլորի կարծիքը հարգում ենք, ես շարունակում եմ հարգել Կարապետ Ռուբինյանի կարծիքը, ինքը իրավունք ունի իմ կարծիքից տարբերվող կարծիք ունենալ: Ցավոք սրտի, այդ կարծիքը գերակա չեղավ վարչության և խորհրդի նիստերում»։
Լուսանկարը՝ Photolure-ի
