Միջուկային դոսյեի հարցով Իրանի հետ պատմական համաձայնության հասնելուց հետո արևմտյան ընկերությունները սկսել են ակտիվորեն յուրացնել իրանական շուկան: Թեհրանը, սակայն, դեռ չի մոռացել պատժամիջոցային ռեժիմի ծանր հետևանքները։ Այս մասին ասել է Իրանի փոխնախագահ Սորեն Սատարին Kommersant-ի հետ հարցազրույցում։
Նրա խոսքով՝ արևմտյան ընկերություններն իսկապես սկսել են ակտիվորեն յուրացնել իրանական շուկան։
«Բայց մենք չպետք է մոռանանք անցյալը։ Մենք խոսում ենք այն մասին, թե ինչի միջով է ստիպված եղել անցնել մեր ժողովուրդը անցյալում պատժամիջոցային ռեժիմի հետևանքների պատճառով»,-ասել է նա։
Որպես նման հետևանքների օրինակ՝ նա բերել է իրավիճակը՝ կապված դեղամիջոցների սղության հետ։
«Ոչինչ չկար հիվանդներին բուժելու համար, նման բանը չի մոռացվում»,- հավելել է նա։ Սատարին նշել է, որ պատժամիջոցային շրջանից հետո ամեն մի ընկերություն, որը ցանկանում է աշխատել Իրանի հետ, պետք է երկիր բերի կա՛մ փող, կա՛մ տեխնոլոգիա։
«Մենք չենք կրկնի սխալները, որոնք թույլ ենք տվել նախկինում։ Դա նշանակում է, որ մենք պարզապես նավթ չենք վաճառի և եկամտով արտադրանք գնենք այլ երկրներից»,- ասել է նա։
Փոխնախագահն ընդգծել է, որ դա Թեհրանի «սկզբունքային դիրքորոշումն» է։
