Mignews-ի փոխանցմամբ՝ սպիտակեցնող նյութերը զգալիորեն թուլացնում են երեխայի իմունային համակարգը՝ այն դարձնելով ավելի խոցելի բազմաթիվ վարակների, այդ թվում նաև գրիպի համար։ Նման եզրահանգման են եկել բելգիացի գիտնականները։
Նրանց կատարած հետազոտությանը մասնակցել է ավելի քան 9000 ընտանիք՝ 6-12 տարեկան երեխաներով, որոնք ներկայացնում են Իսպանիան, Հոլանդիան ու Ֆինլանդիան։ Գիտնականները ծնողներին խնդրել են պատասխանել, թե արդյոք տունը կարգի բերելու ժամանակ օգտագործե՞լ են սպիտակեցնող նյութեր, ինչպիսին որ քլորն է, և եթե այո, ապա որքան հաճախ։
Բացի դրանից՝ նրանք ծնողներից խնդրել են պատասխանել, թե վերջին մեկ տարում իրենց երեխան արդյոք հիվանդացե՞լ է անգինայով, օտիտով, գրիպով, սինուսիտով, բրոնխիտով, թոքաբորբով։ Արդյունքները վկայել են, որ Իսպանիայում ծնողների մոտ 72 տոկոսը շաբաթական առնվազն մեկ անգամ օգտագործել է սպիտակեցնող նյութ, իսկ Ֆինլանդիայում՝ ընդամենը 7 տոկոս։
Պարզվել է, որ այն ընտանիքներում, որոնցում պարբերաբար օգտագործել են սպիտակեցնող նյութեր, երեխաները 20 տոկոսով ավելի շատ են հիվանդացել գրիպով։ Քլորի կիրառման պարագայում դա հասնում է մինչև 35 տոկոսի։
