Կենտրոն և Նորք-Մարաշ վարչական շրջանների ընդհանուր իրավասության դատարանում Ռուբեն Վարդազարյանի նախագահությամբ հետաձգվեց պաշտպանության նախարար Սեյրան Օհանյանի տիկնոջ՝ Ռուզաննա Խաչատրյանի հայցի քննությունը՝ ընդդեմ «Հրապարակ» օրաթերթի:
Հայցը ներկայացված է «Հրապարակ» օրաթերթում լրագրող Սուսաննա (Սյուզան) Սիմոնյանի կողմից հրապարակված, հայցվոր Ռուզաննա Խաչատրյանի պատիվն ու արժանապատվությունը արատավորող, նրան զրպարտող տեղեկությունները, հայցվորի իրավունքը խախտող փաստերի անճշտությունները հերքելու, հայցվորի պատասխանը հրապարակելու, ինչպես նաև «hraparak.am» կայքում տեղադրված «Հանրությունն ուզում է իմանալ» հոդվածը կայքից հեռացնելու պահանջով:
Հայցվոր Ռուզաննա Խաչատրյանը դատական նիստին ներկա չէր, ներկա էր նրա ներկայացուցիչը՝ փաստաբան Կարեն Մեջլումյանը:
Դատական նիստին չէր ներկայացել «Հրապարակ» օրաթերթի ներկայացուցիչը, ով պատշաճ ծանուցված էր, բայց ինչպես տեղեկացրեց պատասխանող Սուսաննա Սիմոնյանը՝ օրաթերթի ներկայացուցիչը թոռնիկ է ունեցել և միգուցե այդ պատճառով չէր ներկայացել դատարան:
Պատասխանող լրագրողի՝ Սուսաննա Սիմոնյանի լիազորագրով այսօր հայցի քննությանը ներգրավվեցին նրա ներկայացուցիչները՝ փաստաբաններ Լուսինե Հակոբյանն ու Տիգրան Եգորյանը:
Վերջիններս միջնորդեցին նիստը հետաձգել՝ գործի նյութերին ծանոթանալու համար: Գործը բաղկացած է կես հատորից, որի մի մասը կազմում են ծանուցագրերը:
Դատական նիստը հետաձգվեց մինչև սեպտեմբերի 4-ը:
