«Առաջին լրատվական»-ի տեղեկություններով՝ իշխանական շրջանակներում անվստահության մթնոլորտ է ձևավորվում Վերահսկիչ պալատի նախագահ Իշխան Զաքարյանի նկատմամբ: Բանն այն է, որ նա հիմա թեև գտնվում է նախագահ Սերժ Սարգսյանի թիմում, սակայն միաժամանակ իր վրա է կրում նախկին նախագահ Ռոբերտ Քոչարյանի ազդեցությունը:
Հիշեցնենք, որ Ի. Զաքարյանը տարիներ առաջ «Բարգավաճ Հայաստան» կուսակցության անդամ էր: 2007թ. նոյեմբերին ՎՊ նախագահ նշանակվելուց հետո նրա անդամակցությունը ԲՀԿ-ում սառեցվեց, ընդ որում՝ նա այդ պաշտոնում նշանակվեց քաղաքական պայմանավորվածության արդյունքում և ԲՀԿ-ի կողմից. այն ժամանակ, երբ այդ կուսակցությունը 2007թ. խորհրդարանական ընտրությունների արդյունքում մի քանի ամիս էր, ինչ մտել էր խորհրդարան և դարձել կոալիցիայի անդամ: Ընդ որում, Ի. Զաքարյանը ՎՊ նախագահ նշանակվելուց առաջ նույնիսկ մի քանի ամիս զբաղեցրել է ԱԺ փոխնախագահի պաշտոնը, իհարկե՝ ԲՀԿ-ին հատկացված քվոտայով:
ՎՊ նախագահ նշանակվելուց հետո սրվեցին նրա հարաբերությունները ԲՀԿ ղեկավար Գագիկ Ծառուկյանի հետ: Ի. Զաքարյանը, բնականաբար, իշխանությունների ցուցումով ստուգումներ սկսեց հատկապես այն նախարարություններում ու գերատեսչություններում, որոնց ղեկավարները ԲՀԿ անդամներ էին:
Հիշեցնենք՝ քաղաքաշինության նախարարությունում, որի ղեկավարը ԲՀԿ անդամ Վարդան Վարդանյանն էր, բացահայտված հարյուրավոր միլիոնների հասնող չարաշահումները բավականին աղմկոտ էին: Եվ Ի. Զաքարյանի ու ԲՀԿ-ի հարաբերություններն այնքան էին սրվել, որ Գ. Ծառուկյանը նրան անգամ փուչիկ անվանեց:
Եվ հիմա թեև Ի. Զաքարյանի հարաբերություններն այնքան էլ հարթ չեն ԲՀԿ-ի հետ, բայց քաղաքական շրջանակներում խոսում են, որ նա ավելի շատ գտնվում է Ռ. Քոչարյանի և ոչ թե Ս. Սարգսյանի ազդեցության ներքո. չէ՞ որ Ռ. Քոչարյանն է նրան իշխանության բուրգով բարձրանալու հնարավորություն տվել: Իսկ մինչ ԱԺ փոխնախագահ ու ՎՊ նախագահ դառնալը՝ նա նույն Ռ. Քոչարյանի շնորհիվ 1997-2003թթ. նշանակվել է ՀՀ մշակույթի, երիտասարդության հարցերի և սպորտի փոխնախարար: 2000-2004 թթ. եղել է Հայաստանի ազգային օլիմպիական կոմիտեի նախագահ, իսկ 2003-2007 թթ.՝ ՀՀ կառավարությանն առընթեր ֆիզիկական կուլտուրայի և սպորտի պետական կոմիտեի նախագահ:
Այս շրջանում գործող իշխանությունները պարզել են, որ նա իսկապես շարունակում է կրել իր քաղաքական կնքահայր Ռ. Քոչարյանի ազդեցությունը: Եվ չի բացառվում, որ առաջիկայում տեղի ունենալիք որոշակի փոփոխությունների արդյունքում նա էլ հրաժեշտ տա պաշտոնին:
Լուսանկարը՝ PanARMENIAN Photo-ի
