Հայ ազգային կոնգրեսի համակիր, բռնցքամարտի Եվրոպայի կրկնակի չեմպիոն Սամսոն Խաչատրյանը երեկ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Մխիթար Պապոյանի որոշմամբ մեկ տարվա պայմանական ազատազրկման դատապարտվեց` դատարանի դահլիճից ազատ արձակվելով:
ՀՀ առաջին նախագահ Լևոն Տեր-Պետրոսյանի մամլո խոսնակ Արման Մուսինյանին «Առաջին լրատվականը» հարց ուղղեց` արդո՞ք Ս. Խաչատրյանի ազատ արձակումը կարելի է դիտարկել Հայ ազգային կոնգրեսի ներկայացրած երեք պահաջների կոնտեքստում:
«Կարծում եմ, որ սա չի կարելի դիտարկել ամբողջ պահանջների կատարման համատեքստում, որովհետև պահանջների այն ծավալը, որը դրվել է, այս առումով համարել դրան ուղղված քայլ` դեռ վաղ է: Երբ շարունակություն լինի,այն ժամանակ միգուցե կարելի է վերանայել այդ մոտեցումը: Սակայն ես ձեռնպահ կմնայի այս պահի դրությամբ Սամսոն Խաչատրյանի ազատ արձակումը որպես պահանջների կատարման հստակ ազդանշան համարել»:
Այդ դեպքում իշխանությունները քաղբանտարկյալներին մեկ-մեկ ազատ արձակելով ի՞նչ նպատակ են հետապնդում, ինչո՞ւ ազատեցին Ս. Խաչատրյանին` հարցեցինք Արման Մուսինյանին. «Սամսոն Խաչատրյանի պարագայում ակնհայտ էր, որ ապօրինի ձերբակալություն է: Կարծում եմ` իշխանությունները փորձում էին խուսափել ևս մեկ ապօրինի դատավարության ընթացքից, որի պատճառով նորից հայտնվելու էին ինչպես հասարակության, այնպես էլ միջազգային հանրության քննադատության տակ: Նրանք փորձեցին այս մի գլխացավանքից ազատվել», պատասխանեց Ա.Մուսինյանը: