Ընդդիմությունը հստակ պետք է ներկայացնի իր հարցադրումները: Այսօր լրագրողների հետ հանդիպման ժամանակ այս մասին ասաց Հանրապետական խմբակցության պատգամավոր Վարդան Այվազյանը: Վերջինս չի նկատում իշխանության և ընդդիմության միջև փակուղային իրավիճակ՝ ՀՀ նախագահ Սերժ Սարգսյանի ասուլիսից հետո: Ըստ նրա՝ փակուղային է ընդդիմության դիրքորոշումը, քանի որ հստակեցված չէ ընդդիմության պահանջը:
«Եթե կա ընդունված նորմերին համապատասխան ընտրություն, ի՞նչ թեմաների շրջանակում պետք է խոսակցություն գնա կողմերի միջև, և եթե ՀՀ նախագահի կողմից արդեն առաջարկներ եղել են, որոնք մերժվել են: Որո՞նք են առաջնահերթ քայլերը, ազգային մեր համաձայնության միասնական ճանապարհը կերտելու հիմնարար հարցադրումները՝ պետք է հստակեցվեն այդ հարցադրումները: Ես ընդունում եմ, որ այս ընդդիմությունը հստակ ձևավորված է, ընդունելի է, բայց դա գալիս է իշխանությունից»,- կարծիք հայտնեց Վարդան Այվազյանը:
«Ժառանգություն» խմբակցության պատգամավոր Թևան Պողոսյանն ի պատասխան Վարդան Այվազյանի՝ ասաց, որ Րաֆֆի Հովհաննիսյանն իր թիմի հետ միասին ամբողջ քարոզարշավի ժամանակ նշել է իր տեսլականը, ներկայացրել պարզ խնդիրներ: Նրա կարծիքով՝ ցանկությունը՝ նստելու և քննարկելու, պետք է լինի ազնիվ, ոչ թե ժամանակ ձգձգելու և առաջարկելու մի գաղափար, որը մերժվել է:
«Եթե մենք կարողանանք իրավիճակ ձևավորել, որտեղ հնարավորություն կլինի երկու նախկին թեկնածուներին նստել բանակցությունների սեղանի շուրջ, ձևավորել օրակարգ, բանակցությունները կունենան իրենց պտուղը: Րաֆֆին անդրադարձել է, որ առնվազն մի խումբ հարցեր կան, որոնք համապետական լուծման կարիք ունեն»,- ասաց Թևան Պողոսյանը:
Բանախոս Վարդան Այվազյանը նշեց՝ ՀՀ նախագահն ասուլիսի ժամանակ ասել է, որ էլի պատրաստ է քննարկել: «Բայց որո՞նք են հարցադրումները, ո՞րն է հացադուլի հիմնական պահանջը: Ե՞րբ մենք կլսենք առաջարկությունները: Կարող է ստվերային կառավարությունը հրովարտակ արձակի, որ պետք է ինչ-որ մեկին գնդակահարել»,- կատակեց Վարդան Այվազյանը:
Թևան Պողոսյանի խոսքով՝ եթե Սերժ Սարգսյանը մեկ անգամ արդեն մոտեցել է հացադուլ հայտարարած մարդու, կարող է նաև Ազատության հրապարակ գալ, տեսակցել քաղաքացի Րաֆֆի Հովհաննիսյանին:
Այս միտքը տարօրինակ է Վարդան Այվազյանի համար: Ըստ նրա՝ անհասկանալի է՝ ինչու են կպել, որ ՀՀ նախագահը գա հրապարակ:
