Թուրքերի գրեթե 50%-ն ակտիվորեն օգտվում է համացանցից: Այս ցուցանիշով Թուրքիան գրավել է Եվրոպայում 7-րդ տեղը՝ հայտնում է timeturk.com կայքը:
Միջազգային առաջատար Boston Consulting Group ընկերությունը նախապատրաստել է 2012թ. Թուրքիայում ինտերնետ-տնտեսության ամենամյա հաշվետվությունը, որի համաձայն՝ երկրի բնակչության 47%-ը հասանելի է համացանցին:
Անցկացված հետազոտությունը ցույց է տվել, որ 2007-2012թթ. տեղի է ունեցել կտրուկ առաջընթաց երկրի ինտերնետ-տիրույթում: Համացանցից օգտվող թուրքերի թիվը ավելի քան կրկնակի աճել է ու կազմել 36 մլն բնակիչ:
Բնակչության մեկ երրորդը համացանցից օգտվում է աշխատավայրից, 16%-ը՝ ինտերնետ-ակումբներից:
Թուրքերը համացանցային տիրույթում գտնվում են շաբաթական միջինը 38 ժամ:
Ինտերնետից ակտիվորեն օգտվող թուրքերի մեծ մասը հիմնականում բնակվում է Թուրքիայի եվրոպական՝ արևմտյան մասում:
Առավել ակտիվ օգտատերերը մեգապոլիսների բնակիչներ են՝ 77%, իսկ շրջանային նշանակության ոչ մեծ քաղաքներում համաշխարհային ցանցից հնարավորություն ունի օգտվելու օգտատերերի միայն 57%-ը, գյուղական վայրերի բնակիչների միայն 26%-ն է օգտվում համացանցից:
