Լիբիայի արտաքին գործերի նախարար Աբդ Ալ-Աթի Ալ-Ուբայդին հայտարարել է, որ իր երկիրը պատրաստ է անցկացնել ազատ և արդար ընտրություններ, որոնց կհետևեն միջազգային դիտորդները: Սակայն նա միաժամանակ նշել է, որ այդ ընտրությունները կարող են տեղի ունենալ միայն 6 ամիս անց այն բանից հետո, երբ երկրում կդադարի զինված հակամարտությունը: Այս հայտարարությունը նորանշանակ նախարարն արել է` հարցազրույց տալով մի քանի արևմտյան լրատվամիջոցների: Այս մասին հաղորդում է The Guardian-ը:
Նա նաև հավելել է, որ մինչ այդ հնարավոր է ստեղծել անցումային ազգային համաձայնության կառավարություն: Տրիպոլին կողմ է արտահայտվել նաև քաղաքական և տնտեսական բարեփոխումների վերաբերյալ քննարկումներ անցկացնելու հարցին, որի ընթացքում հնարավոր է նաև խոսել Լիբիայի առաջնորդի ապագայի վերաբերյալ` «կմնա՞ նա արդյոք Լիբիայի առաջնորդի դերում, թե՞ հետ կքաշվի այդ գործերից»:
Ուբեյդիի հայտարարություններն աչքի են ընկել աննախադեպ բարյացակամությամբ: Ողջ հարցազրույցի ժամանակ նա ապստամբներին ներկայացրել է որպես «մեր եղբայրներ», որոնց հետ անհրաժեշտ է նստել բանակցությունների սեղանին` նշելով, որ միջազգային հանրությունն իրենց հնարավորություն պետք է տա ինքնուրույն լուծելու ներլիբիական հարցերը:
