Շենգավիթ վարչական շրջանի Նոր Խարբերդ թաղամասի ամառանոցներ կոչվող հատվածի բնակիչներն ահազանգել էին խմբագրություն՝ տեղեկացնելով, որ ոռոգման ջրի բացակայության պատճառով այգիները չորանում են: Բնակիչների խոսքով՝ այս շոգին փոխանակ մի քանի օրը մեկ ջուր տան, որ այգիները ջրեն, շաբաթներով ոռոգման ջուր չի լինում, ինչի պատճառով ծառերը պարզապես չորացել են:
Շենգավիթ համայնքի Նոր Խարբերդ այգեգործական տնտեսության ջրամատակարարման սպասարկման պատասխանատու Արմեն Մովսիսյանը «Առաջին լրատվական»-ի հետ զրույցում ասաց, որ իրենք ոռոգման ջուրը շաբաթը մեկ են տալիս՝ շաբաթ, կիրակի օրերին: Վերջին օրերին, շոգ եղանակով պայմանավորված, մեկ օր ավել էին տալիս, պարզապես այս օրերին պոմպերի հետ խնդիր է առաջացել: «Այս շաբաթ և կիրակի մի պոմպն եմ աշխատեցրել միայն, քանի որ մյուսները շարքից դուրս են եկել: Բայց այդ մի պոմպով մոտ 70 տոկոս կարողացել եմ ապահովել, իսկ մնացած 30 տոկոսը ջուր չի ստացել, քանի որ պոմպերը պետք է աշխատեին, ջուրը հավաքվեր ավազանի մեջ ու նոր մատակարարվեր»,- ասաց Մովսիսյանը՝ հավելելով, որ պոմպերը նորոգվում են, և հաջորդ շաբաթ արդեն պատրաստ կլինեն, ու ջրամատակարարումը կվերականգնվի:
Մովսիսյանը նշեց նաև, որ այս համայնքի ջրամատակարարման համակարգը փակ համակարգ է, կառուցվել է 70-ականներին, այդ պատճառով խողովակները շարքից դուրս են եկել, պայթում են, վնասվում և խցանվում են: «Մոտ 40-50 կիլոմետր խողովակաշարը բարոյապես և ֆիզիկապես մաշված է, բացի դրանից՝ այն անցնում է մարդկանց հողամասերի միջով, մարդիկ առանձնատներ են կառուցել խողովակաշարի վրա: Այսինքն՝ արհեստական խոչընդոտներ են ստեղծվել մեզ համար հենց բնակիչների կողմից, և խցանումների կամ վթարների ժամանակ մենք չենք կարողանում նորոգել դրանք»,- հավելեց մեր զրուցակիցը:
Մեր դիտարկմանը ի պատասխան, թե այդ դեպքում խնդիրն ինչպե՞ս պետք է կարգավորվի, ինչո՞ւ են թույլ տվել, որ բնակարանները կառուցվեն խողովակաշարի վրա, Մովսիսյանը նկատեց, թե քաղաքապետը ևս տեղյակ է խնդրին, որ մղման խողովակաշարարի վրա տներ են կառուցվել, և փորձ է արվում խնդիրը կարգավորել: Ներդրումներ են արվում, ֆինանսավորումն է ավելացվում, որ խողովակաշարերը փոխվեն, համակարգը նորոգվի, որ այլևս նման խնդիրներ չառաջանան:
Լուսանկարը՝ armtimes.com-ի
