«Ժառանգություն» կուսակցության վարչության անդամ Հովսեփ Ղազարյանը, «Առաջին լրատվական»-ի հետ զրույցում անդրադառնալով «Քաղաքացիական գիտակցություն» կազմակերպության անդամների՝ իրեն ուղղված մեղադրանքներին, նշեց.
«Հիմարություն են այդ պնդումները… ինչպե՞ս կարող ենք հարձակվել, եթե իրենց հրավերով ենք այնտեղ եղել և բազմիցս պնդել ենք սրճարանում՝ մարդաշատ վայրում նստել խոսել։ Նարեկը եթե պնդում է, որ ես քրեական վարքուբարք ունեմ, ապա բոլորիս հայտնի է, որ քրեական պահվածք ունեցող մարդը չի հրավիրում սրճարան, դրա համար կան ուրիշ տեղեր, և չի գնում իր քաղաքական գաղափարակից ընկերների հետ, այլ այլ անձանց հետ է գնում։ Եվ պարզ է դառնում, որ Նարեկը ստում է, և իրենց կողմից կատարած անօրինականությունները ներկայացնում որպես մեր կողմից իրականացված հանցագործություն։ Այստեղ ճիշտ հակառակ երևույթն է տեղի ունեցել։ Մենք գնացել ենք քաղաքական բանավեճի, բայց նրանք կազմակերպված ձևով սադրեցին, և զենքի կիրառմամբ խուլիգանություն իրականացրին և դաժանորեն ծեծի ենթարկեցին մեր տղաներից երեքին, դա արեցին վերջում»,-ասաց Հովսեփ Ղազարյանը։