Coca-Cola Bottlers Georgia ընկերության հիմնադիր Թեմուր Չկոնիան կատակ է անվանել իր հայտարարությունն այն մասին, որ այդ ընկերությունը Coca-Cola է մատակարարում Կրեմլ և անձամբ Ռուսաստանի նախագահ Վլադիմիր Պուտինին: Այս մասին գործարարը հայտնել է Թբիլիսիի Kommersant ռադիոյին:
Անցած շաբաթ ԶԼՄ-ները հաղորդել էին, որ վրացական արտադրության գազավորված ըմպելիք է հայտնաբերվել նախագահի Նովո-Օգարևո նստավայրի մամուլի սրահում՝ Պուտինի և Պաղեստինի ինքնավարության առաջնորդ Մահմուդ Աբասի հանդիպման ժամանակ: Երբ այնտեղ լրագրողների կողմից հայտնաբերված ըմպելիքի մասին հայտնել են նախագահի մամլո քարտուղար Դմիտրի Պեսկովին, նա ասել է չափորոշիչների համապատասխանությունը ստուգման ենթարկելու անհրաժեշտության մասին:
Պատասխանելով այն հարցին, թե Պուտինը կամ նրա հյուրերից որևէ մեկը փորձե՞լ է Կոլան, Պեսկովն ասել է, որ նախագահն այդ ըմպելիքից չի խմում, աշխատանքային ճաշկերույթների ժամանակ այն նույնպես չի մատուցվում:
Ավելի ուշ, մեկնաբանելով այդ տեղեկությունը, Չկոնիան հայտարարել էր, որ վրացական արտադրության ըմպելիքը Պուտինի նախագահական նստավայրում հայտնվել է ոչ պատահական, քանի որ այն շուկա դուրս չի բերվում, և հատուկ գնում են միայն Ռուսաստանի նախագահի համար` տարեկան մոտավորապես 2000 շիշ:
