Իլինոյսի համալսարանի հետազոտողները ծնողներին խորհուրդ են տալիս հետևել, որ երեխաները հնարավորինս շատ շարժվեն: Մասնագետները պարզել են, որ ֆիզիկական լավ վիճակը նպաստում է ուղեղի՝ մաթեմատիկական ունակությունների հետ կապված մասի զարգացմանը: Մասնավորապես, ուղեղում պակասում է գորշ նյութը՝ հայտնում է Zee News-ը:
Նորմայում ուղեղն աստիճանաբար ազատվում է անպետք կապերից և ամրապնդում է օգտակարները: Նախորդ հետազոտությունները ցույց են տվել, որ գորշ զանգվածի նվազելը կապված է մտավոր բարձր կարողությունների հետ: Նոր հետազոտությանը մասնակցել է 9-10 տարեկան 48 երեխա: Գիտնականները չափել են մասնակիցների մոտ թթվածնի սպառման առավելագույն քանակը:
Պարզվել է՝ երեխաների 50%-ն ավելի ակտիվ է եղել: Այնուհետև հետազոտողները երեխաներին մագնիսա-ռեզոնանսային տոմոգրաֆիա են արել և գնահատել են նրանց մաթեմատիկական, կարդալու, գրելու ունակությունները: Հետազոտությունը ցույց է տվել, որ ֆիզիկապես ավելի ակտիվ երեխաների ուղեղում ավելի քիչ գորշ նյութ է եղել, նրանք ավելի լավ են գլուխ հանել մաթեմատիկայից, քան մյուս մասնակիցները: Կարդալու և գրելու ունակության վրա ֆիզիկական վիճակը չի ազդել:
