ԱՄՆ ևս երկու սենատորներ՝ դեմոկրատներ Ջոն Թեսթերը` Մոնտանա նահանգից, և Էլ Ֆրանկինը՝ Մինեսոտայից, հայտարարել են ԱՄՆ կոնգրեսում այս տարվա սեպտեմբերին անցկացվելիք քվեարկության ժամանակ Իրանի միջուկային ծրագրի շուրջ համաձայնագրին աջակցելու իրենց մտադրության մասին: Այս մասին գրում է TASS-ը:
«Ես վստահ եմ, որ մեր զինված ուժերը և հետախուզական ծառայությունները ուշադիր կհետևեն Իրանին: Ատոմային էներգիայի միջազգային գործակալությունը ևս ակտիվորեն կհետևի»,- իր հայտարարության մեջ նշել է Թեսթերը՝ ընդգծելով, որ այդ կերպ ԱՄՆ-ն Իրանին վերահսկելու ավելի մեծ հնարավորություն կունենա, քան երբևիցե՝ սկսած 70-ականներից:
«Դա կատարյալ համաձայնագիր չէ,- իր հերթին ասել է Ֆրանկինը,- սակայն դա ավելի արդյունավետ է, իրական հնարավորություն՝ Իրանին թույլ չտալու ստանալ միջուկային զենք հաջորդող 15 տարիների ընթացքում»:
Այսպիսով՝ 18 դեմոկրատ սենատորներ մտադիր են աջակցել Իրանի հետ գործարքին:
