Նյու Յորքում տեղակայված ContourGlobal էներգետիկ ընկերությունն ու ՀՀ կառավարությունը հայտարարել են Որոտանի ՀԷԿ-ի ակտիվների ձեռք բերման գործարքի ավարտի մասին։ Այս մասին հայտնում է PR Newswire-ը՝ հղում անելով ընկերության հաղորդագրությանը։
ContourGlobal-ը նաև հայտնել է, որ Միջազգային ֆինանսական կորպորացիան, որը Համաշխարհային բանկի խմբի անդամ է, 20 տոկոս մասնաբաժին է ձեռք բերել ContourGlobal հիդրոկասկադում՝ օգնելու ձեռք բերել, շահագործել և վերականգնել Որոտանի հիդրոէլեկտրական կասկադը։ Նախագիծը նպատակ ունի բարձրացնել էլեկտրամատակարարման հուսալիությունն ու ուժեղացնել երկրի էներգետիկ ոլորտը։
Գործարքը ներկայացնում է ԱՄՆ ամենախոշոր մասնավոր ներդրումը Հայաստանի պատմության մեջ և առաջին ամերիկյան ներդրումը՝ Հայաստանի էներգետիկ ոլորտում։ Որոտանի հիդրոկասկադն ապահովում է Հայաստանի էլեկտրական համակարգի հնարավորության մոտ 15 տոկոսը։
ContourGlobal-ը հաջորդ 6 տարիներին ավելի քան 50 մլն եվրո կներդնի Որոտան գետի 3 կայանների արդիականացման, գործառական բարելավման, անվտանգության, հուսալիության և արդյունավետության ծրագրում։ Արդիականացումը կստեղծի 150 կարճաժամկետ աշխատատեղեր՝ ի հավելումն օբյեկտներում երկարաժամկետ հիմունքով աշխատող 150 տեխնիկական մասնագետների։
ՀՀ էներգետիկայի և բնական պաշարների նախարար Երվանդ Զախարյանն այս առիթով ասել է, որ ուրախ են ավարտին հասցնելու այս գործընթացը ContourGlobal-ի հետ։ «Վստահ ենք, որ ContourGlobal-ը հաջող կերպով կտնօրինի, կպահպանի և կշահագործի այս կարևոր էներգետիկ համալիրը, և գոհ ենք ContourGlobal-ի ծրագրած ներդրումից, որն ապագայում կբարելավի Հայաստանի էներգետիկ համակարգի կայունությունը, անվտանգությունն ու գործունեությունը»։
