Կիպրոսի նախագահ Նիկոս Անաստասիադիսը երկրի ֆինանսական խնդիրներն անվանել է ամենավատ ճգնաժամը՝ 1974-ի թուրքական ներխուժման ժամանակվանից հետո: Ժողովրդին ուղղված հեռուստաուղերձում նա խոստացել է ավանդատուներին մասամբ փոխհատուցել դեպոզիտների հարկադիր հարկման կորուստները: Այս մասին հայտնում է BBC-ն:
Կիպրոսի խորհրդարանը այսօր կքննարկի ժողովրդի վրդովմունքը հարուցած համաձայնագիրը, որը ձեռք է բերվել իշխանությունների և ԱՄՀ-ի ու ԵՄ-ի միջև, ըստ որի՝ բանկային ավանդները պետք է միանվագ հարկվեն:
Ֆինանսական օգնության տրամադրման դիմաց հարկերի ներմուծումը առաջին հերթին պարտադրել է Գերմանիան, որը մտավախություն ունի, որ Կիպրոսի բանկերը կարող են օգտագործվել փողերի լվացման համար:
«Որոշումը, որին մենք հանգել ենք, հեռու է իդեալականից, սակայն այն բոլոր հնարավոր տարբերակներից առավել քիչ ցավալին է»,- ասել է նախագահը:
