Սիրիական բանակի Նյութատեխնիկական բաժնի պետ, գեներալ Մուհամմեդ Հալուֆը փախել է երկրից: Այս մասին հայտնում է Al-Arabiya հեռուստաալիքը:
Հեռուստաալիքի տվյալներով՝ գեներալը փախել է իր որդու հետ, ով սիրիական բանակի կապիտան է: Փախուստի իրականացման հարցում նրան օգնել են սիրիացի ապստամբները: Հալուֆի խոսքերով՝ ինքը վաղուց էր ծրագրում փախչել երկրից, սակայն դրա իրականացման համար շատ ժամանակ է պահանջվել:
Բացի այդ, ինչպես հաղորդում է հեռուստաալիքը, մարտի 16-ին սիրիական բանակից փախել է նաև Կուբայում Սիրիայի դեսպան Հայթամ Հումայդանը և Սիրիայի ԱԳՆ ներկայացուցիչ Ջիհադ Մակդիսին:
Ինչպես հավելում է Agence France-Presse-ը՝ հղում անելով Youtube-ում սիրիական ընդդիմության ներկայացուցիչների տեղադրած տեսանյութին, գեներալն իր որդու հետ Հորդանան է փախել: Ապստամբների խոսքերով՝ փախուտը կատարվել է դեռևս մարտի 15-ին, սակայն իրենք չեն ցանկացել տեղեկությունը հրապարակել, քանի դեռ համոզված չէին, որ նրանք բարեհաջող տեղ են հասել:
Սիրիայում 2011-ի գարնանից ընթացող հակամարտության մեկնարկից մինչ օրս սիրիական բանակի շարքերը լքել է ավելի քան 40 գեներալ:
