«Ժառանգություն» կուսակցության պատգամավոր Զարուհի Փոստանջյանը, ելույթ ունենալով հանրահավաքին, անդրադարձել է ՍԴ որոշմանը: Նա ասել է, որ որոշման հրապարակումից հետո որևէ մեկի դեմքին ժպիտ չկար, որովհետև բոլորը հասկանում էին՝ դատավորներն առևտրային գործարք են կատարել սատանայի հետ, նրանք իրենց խիղճը վաճառել են սատանային, միգուցե այդ սատանային՝ Սերժ Սարգսյանին:
Զարուհի Փոստանջյանն այն կարծիքին է, որ որևէ մեկն իրեն գոհ չի զգում այդ գործարքից:
«Գագիկ Հարությունյանը՝ այդ մարդը, հաշվարկներ էր կատարում, թե քանի մարդ է մասնակցել հանձնաժողովներում ընտրական գործընթացներին, փոխարենը հաշվարկեր, թե քանի մարդ է լքել ՀՀ-ն և քանի բողոքին է ընթացք տրվել: Երբ միջնորդություններ էինք անում, այդ ժամանակ Գագիկ Հարությունյանը նյարդայնանում էր, իսկ մենք ասում էինք՝ 1988 ընտրատեղամասերի պարկերը բերենք դատարան և համոզվենք, թե ով ինչ ձայն է ստացել և գրպանել ժողովրդի քվեն»,-ասել է Զարուհի Փոստանջյանը:
Նա նաև նշել է, որ Դավիթ Հարությունյանի և Հրայր Թովմասյանի կողմից մերժվեց միջնորդությունը.
«Եթե այդքան ազնիվ եք, կողմ լինեիք այդ միջնորդությանը, բերեիք դրանք դատարան և տեսնեինք՝ ինչ է պարունակությունը, նրանք ատամներով առարկում էին»:
Նա նաև ասել է, որ վկաների, փորձագետների միջնորդեցին հրավիրել դատարան, այս միջնորդությունը և այլ միջնորդություններ մերժվեցին, դատարանն անգործություն դրսևորեց.«Այդ դատարանը պետք է հասկանար, որ իր անգործությամբ նպաստում է, որ սատանան դիմի իրենց և իրենք էլի վաճառեն իրենց խիղճը: Շուրջ 100 տարի առաջ մեր դավաճանները մասնակից դարձան ցեղասպանությանը թուրքերի հետ միասին»,-ասաց նա՝ հավելելով՝ մենք հարգում են մարդուն՝ որպես գերագույն արժեք, որևէ մեկին չենք գնդակահարելու, բայց որևիցե դատավորի չենք ներելու կողոպուտի, քվեի գրպանահատման համար, չենք հանդուրժելու որևէ մարզպետի օրինազանցություն:
Սևանի քաղաքապետը, նրա խոսքով, փոխարենը տղամարդ լինի, ոստիկանություն դիմում է գրել կնոջ նկատմամբ, որն իրեն զրպարտել է՝ չհասկանալով, որ քաղաքացիական դատարանին պետք է հղի իր դիմումը:
«Այսպիսի վախկոտ մարդկանցով էլ փորձել են կազմակերպել ընտրակեղծարարությունը: Սե՛րժ Սարգսյան. Դուք եք կազմակերպել ՀՀ-ում կեղծարարությունը և կեղծիքների ողջ գործընթացը և ժողովրդի քվեն պահում եք, թույլ չեք տալիս բացել»,-ասել է Զարուհի Փոստանջյանը:
